Служба сщмч. Михаилу Маркову

Служба сщмч. Михаилу Маркову

Память 3(16) июня

НА ВЕЛИЦЕЙ ВЕЧЕРНИ

По предначинательном псалме,  Блажен муж: 1-й антифон.

На Господи воззвах: стихиры, глас 2.
Подобен: Егда от Древа:

Егда, Михаиле чудне, / в возраст зрелости душевныя пришел еси, / ты к духовному учению привлеклся еси волею, / таже таланты, от Бога ти данныя, умножая, / сеял семена истиннаго мировидения / во умах и сердцах юных, / да пожнеши сторичный боговедения клас, / иже есть любы евангельская // ко Господу и искреннему.

Егда, Михаиле мудре, / почи от земных трудов благочестивый родитель твой, / ты разумел еси в сем призвание свое к пастырству, / таже, приим великую священства благодать, / паки вселился еси в дому отца твоего, / да словом паче и житием / научиши люди Божия, / яже есть любы евангельская // ко Господу и искреннему.

Егда, Михаиле честне, / служение пастырское совершал еси, / много поучал еси люди, вверенныя ти Промыслом, / еже праздники святыя чтити / и никакоже страшитися прещения безбожных, / яко вышши есть мирских забот, / паки трудов же и тревог / любы евангельская // ко Господу и искреннему.

Егда, Михаиле ревностне, / година лютых безбожных гонений наста, / ты за веру отеческую всеусердно подвиглся еси, / многажды заточение неправедное претерпевая, / обаче не попустил еси / присным сокрыти тя, / якоже великий Богоносец Игнатий, / являя искренним // евангельскую любовь ко Господу.

Кто, Михаиле многострадальне, / изречет болезни души твоея, / егда за исповедание веры Христовы / изгнан был еси от семьи и паствы, / егда запустению предадеся место святое храм, / идеже смолкла / неумолкающая проповедь / любви евангельской // ко Господу и искреннему.

Егда, Михаиле долготерпеливе, / возвратился еси паки в Горетово, / новое испытание тебе Господь попусти: / томление велие лишением литургисания, / еще же и глад и скорби многоразличныя, / яже единением дивным / сплотиша семью твою, / сице бо воспитует Господь // любовь ко искреннему.

Егда, Михаиле светле, / начало служению новому полагал еси / во храме Спасова Преображения, / возлюбил есть вельми народ тебе, искушеннаго, / сего ради могущаго помощи искушаемым, / егда же ты во время лютое / возсозидати Божий храм дерзнул еси, / готови быша людие души полагати за тя, // скрепи бо вы евангельская любы ко Господу.

Егда, Михаиле небоязненне, / на конечный суд безбожнии призваша тя, / ты ни единыя вины своея не признал еси, / таже слово дерзновенное утвердил еси, / яко власти вашея несмь батрак, / и тако, неправедное осуждение прием, / на месте мучительства душу святую твою / за Христа Господа мирно предал еси, // исполнив закон любве евангельския.

Слава, глас тойже:  Что принесем тебе в похвалу, / Михаиле, добрый пастырю наш, / яко наследнику славы нетленныя, / киими бренными словесы / прославим небошественный подвиг твой, / обаче приими сие малое пение, / донеси е ко Господу, // и умоли, святе, обрести нам велию милость.

Вход. Прокимен дне и чтения 3.

Пророчества Исаиина чтение:

Обратися от небесе, Господи, и виждь от дому святаго Твоего и славы Твоея: / где есть ревность Твоя и крепость Твоя? / Где есть множество милости Твоея и щедрот Твоих, яко терпел еси нам, Господи? / Ты бо еси Отец наш, яко Авраам не уведе нас, и Израиль не позна нас, / но Ты, Господи, Отец наш, избави ны, яко изначала Имя Твое на нас есть. / Почто уклонил еси нас, Господи, заблудити от пути Твоего? / Ожесточил еси сердца наша, еже не боятися Тебе? / Обратися раб Твоих
ради, племен ради наследия Твоего. / Да помале наследствим гору святую Твою. / Противницы наши попраша святыню Твою. Быхом яко от начала, егда не владел еси нами, ниже назвася Имя Твое на нас. / Аще отверзеши небо, трепет приимут от Тебе горы и растаются, яко воск от лица огня тает. / И попалит огнь супостаты Твоя, и явлено будет Имя Твое противным Твоим. / От лица Твоего языцы возмятутся. Егда сотвориши славная, трепет приимут от Тебе горы. / От века не слышахом, ниже очи наши видеша Бога, разве Тебе, и дела Твоя истинна, и сотвориши терпящим Тя милость. / Срящет бо милость творящия правду, и пути Твои помянут. / И ныне, Господи, Отец наш Ты еси, мы же брение; и Ты Создатель наш, и дела рук Твоих вси мы. / Не прогневайся на ны, Господи, зело, и да не помянеши во время грехов наших; / и ныне призри, Господи, яко людие Твои вси мы.

Премудрости Соломони чтение:

Праведник аще постигнет скончатися, в покои будет. / Осудит же праведник умираяй живущия нечестивыя; / узрят бо кончину праведнаго и не уразумеют, что усоветова о нем, и во что утверди его Господь: / приидут бо в помышление согрешений своих ужасни, и обличит их противу беззакония их. / Тогда станет в дерзновении мнозе праведник, пред лицем оскорбивших его и отметающих труды его. / Видевше же его смятутся страхом многим, и ужаснутся о преславном спасении его. / И рекут в себе, кающеся: / сей бе, егоже имехом некогда в посмех и в притчу поношения. / Безумнии, житие его вменихом неистово, и кончину его безчестну. / Како вменися в сынех Божиих, и во святых жребий его есть? / убо заблудихом от пути истиннаго, и правды свет не облиста нам, и солнце не возсия нам. / Беззаконных исполнихомся стезь и погибели, и ходихом стези непроходны, / пути же Господня не разумехом.

Премудрости Соломони чтение:

Похваляему праведнику, возвеселятся людие: / безсмертие бо есть память его, / яко от Господа познавается и от человек, / и угодна Господеви душа его. / Возлюбите убо, о мужие, мудрость и поживете: / восхощите ея и наказани будете. / Начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас таин Божиих, / яко Той мудрости Наставник есть, и мудрых Исправитель, / и всякому смыслу и делу Хитрец. / И всем смыслом научит мудрость, / есть бо в ней Дух Разумен и Свят, / и сияние Света присносущнаго, и образ благости Божия. / Тая други Божия и пророки устрояет, / благолепнейши же есть солнца и паче всякаго сотворения звезд, / свету сосуждаема, обретается первейши. / Тая угождающих ей от болезни избави / и настави на стези правыя. / Даде им разум имети свят, / и сохрани я от ловящих, и подвиг крепок подаде им. / Да разумеют вси, яко сильнейши всего есть благочестие, / и никогдаже преможет злоба мудрости, / ниже прейдет злыя обличающи суд. / Рекоша же в себе, помысливше неправедно: / насильствуем праведному, и не пощадим преподобства его, / ни усрамимся седин старости многолетны. / Будет бо нам крепость закон / и уловим праведнаго, / яко неугоден нам есть, / и противится делом нашим, и поносит нам отпадение закона, / и обличает нам согрешения наказания нашего. / Возвещает нам разум имети Божий, / и отрока Господня себе именует. / Бысть нам на обличение помышлений наших / и тяжек нам есть и видим, / яко неподобно иным житие его, и изменены стези его. / В поругание вменихомся ему, / и удаляется от путей наших, яко от нечистот, / и блажит последняя праведных. / Увидим убо, аще словеса его истинна суть, / искусим, яже сбываются ему. / Руганием и мукою истяжем его, / да разумеем кротость его и искусим беззлобство его, / смертию безобразною осудим его, / будет бо посещение от словес его. / Сия помыслиша и прельстишася, ослепи бо я злоба их, / и не разумеша таин Божиих и не разсудиша, / яко Ты еси Бог Един, живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив, и даяй преподобным Своим Благодать, / и Своею мышцею гордым противляяйся.

На литии стихиры, глас 8.
Подобен: О преславнаго чудесе:

Отче Михаиле всехвальне, / на степени евангельских блаженств возшед, / нищету духовную в основание пути положив, / Царству Небесному присвоен был еси, / плач о пастве, яко о себе самем, стяжав, / утешаешися изобильно в Дусе Святе, / таже скорби претерпев пачеестественныя, / землю кротких наследовал еси, // утверди и нас в христоподражательнем смирении.

Отче Михаиле всечестне, / правды мира сего до конца отвергся, / яко, по пророку, руба поверженнаго, / алкав точию правды Божия, / и жаждав Самоименованныя Истины Христа, / насыщаешися ныне трапезы безсмертныя, / и миловав состраданием скорбящия, / совершенныя милости приобщаешися, // судом истинным и милостию настави нас.

Отче Михаиле всесветле, / о чистоте сердечней верно воинствовав, / победил еси супостатов видимых с невидимыми, / ныне же зриши несредственне Святую Троицу, / в Еяже храме на лета многая молился еси, / таже духом мирным вся от Бога испытания приим, / тысящи, о нихже молиши, спасаеши / по слову Серафима преподобнаго, // яко по благодати наследник Божий и сын.

Отче Михаиле всеславне, / изгнанный сугубо за правду, / со Христом сия поприща прошел еси, / и Его ради от безбожных люте возненавиденный, / семьи и паствы разлученный, / паки же оболганный и умученный, / сораспятия и сорадости Христовой исполнь, / веселишися мздою Небеснаго Царствия, // егоже да наследуем твоими молитвами.

Слава, глас и подобен тойже: Отче Михаиле вселюбезне, / восходом твердым благочестия житие прошед, / очи мысленныя в горняя вперив, / в Крови Агнчи душевныя ризы исправ, / в горниле страдания всего себе очистив, / евангельски претерпевый до конца, / сего ради, зерцалом разрешшимся, / выну зриши, Егоже возжелел еси, Христа, // во свете Его и нас не забуди.

И ныне, самоподобен: О преславнаго чудесе! / Небесе и земли Царица, / от святых сродников наших умоляемая, / доныне землю Русскую покрывает / и лика Своего изображеньми милостивно обогащает. / О, Владычице Державная! / Не престани и на будущее время / во утверждение на Руси Православия // милости и чудеса изливати до века. Аминь.

На стиховне стихиры, глас 2.
Подобен: Доме Евфрафов:

Земле древняя Можайская, / во бранех прославленная, / подвиги отцев просиявшая, / паки украшайся // славою Михаила священномученика!

Стих: Праведник яко финикс процветет, / яко кедр, иже в Ливане, умножится.

Доме Божий, / храме Троицы Святыя! / созывай к молитве верныя, / сице бо возродишися // дерзновением священномученика.

Стих: Насаждени в дому Господни, / во дворех Бога нашего процветут.

Михаиле, святче Божий, / пастырю Христов изрядный, / воине добропобедный Духа, / поминай пред Господем // чтущих тя, священномученика.

Слава, глас и подобен тойже: Паства новая, / от конец собранная, / кровию святых призванная, / еже жити во Христе, // вере подражай священномученика.

Тропарь, глас 5:

Духом древних мученик горя, / пастырскою ревностию распаляяся, / огненнаго дерзновения исполнился еси, / до конца душу негасиму соблюд, / в жертву себе Господеви принес, / яко солнце во Царствии Отца возсиял еси, / Михаиле священномучениче, / моли Света миру Христа, // не лишитися нам дерзновения в день судный.

НА УТРЕНИ

На Бог Господь: тропарь святаго дважды. Слава, и ныне, Богородичен: Радуйся, Двере Господня непроходимая:

По 1-м стихословии седален, глас 6:

Во смирении воспитай, святый пастырю, / терпением утверди, отче, / милосердию чада настави твоя, / да не прекращение кое дамы // благовествованию Христову.

Слава, и ныне: Смирения глубино, терпения крепосте, / милосердия Мати Чистая, // не презри ны, непотребныя рабы Твоя.

По 2-м стихословии седален, глас 3:

Клеветы человеческия / и напрасныя смерти избави ны, отче, / яко воистинну несть студа упова-
ющим / на молитвы святых, // искушенных по всяческим.

Слава, и ныне: Тобою дерзаем и Тобою хвалимся, / Тебе поверяем беды и скорби наша, / яко Заступнице усердной // и спасения Ходатаице.

По полиелеи седален, глас 3:

И по преставлении твоем, Михаиле, / заступник пастве являешися, / яко и людем, от врагов во храме заключенным / и обреченным тако на лютую смерть, / ни единаго вреда претерпети: // се молитвы сила пастыря и мученика.

Слава, и ныне: Немощным нам присно помогаеши, / яко Самообещаннаго Помощника рождшая, // о Дево, безпомощных Помоще.

Прокимен на утрени, глас 4: Святым, иже суть на земли Его, / удиви Господь вся хотения Своя в них. Стих: Предзрех Господа предо мною выну, / яко одесную мене есть, да не подвижуся.

Евангелие от Матфеа, зачало 36.

По 50-м псалме стихира, глас 6:

Слову Господа Подвигоположника, / еже никакоже страшитися / души коснутися не могущих, / сердцем трепетным, Михаиле, внимал еси, / темже скорби многия терпети укрепился еси, / паки и дерзновение о Христе стяжав, / исповедав Того среди безбожныя тьмы, // приобщился еси победе Победившаго мир.

Канон, глас 4,
егоже краегранесие сице: Михаиле чудне,  помолися о верою и любовию тя поющих.

Песнь 1

Ирмос: Моря чермную пучину / невлажными стопами / древний пешешествовав Израиль, / крестообразныма Моисеовыма рукама // Амаликову силу в пустыни победил есть.

Иже немощная врачуяй, Слове Всемилостиве, помяни немощь мою, слово неложное низпосли ми воспети пастыря добраго и свидетеля Твоего.

Христова радость исполни люди, тебе рождшуся, Михаиле, в семье служителя Божиих Таин в праздник Пречистыя Богородицы.

Архистратига великаго именем нареклся еси, да явиши серафимскую ревность о славе Творящаго Ангелы Своя духи и слуги Своя огнь палящ.

Богородичен: Исполни, яко Благодатная, Марие Чистая, благодарения души наша о явленных и неявленных милостех Твоих, да неложно имя христианское в житии пронесем.

Песнь 3

Ирмос: Лук сильных изнеможе, / и немощствующии препоясашася силою, // сего ради утвердися в Господе сердце мое.

Елисавету благую супружницу избрав, первее с нею к учительству в мире сподвиглся еси, и, достиг меры возраста, паки и доброе свидетельство от внешних притяжав, духовное учительство и подвиг избираеши.

Час конца помыслив, мудре, отцу пресвитеру преставльшуся, сан священный и залог Святых Таин приял еси, таже трудолюбно данный ти талант умножив, ныне мздою благаго икономства веселишися в чертозе Христове.

Утверждение о Господе в основание пастырскаго пути положив, силою крестною поборал еси страсти на душу воюющия, Михаиле добропобедне, делом и словом в Божием страсе утверждая пасомыя.

Богородичен: Деву и Матерь Тя вемы воистину, труждающихся помощь, скорбящих утешение и погибших взыскание, новомучеников велие дерзновение.

Седален:

Дом Божий яко истинное место священия зело возлюбил еси, Михаиле, слову Писания благоговейным духом внимал еси; сего ради Христос дарова ти не токмо в Него веровати, но и по Нем страдати.
Слава, и ныне: Не погибнем, на Тя надеющиися, но живи будем Твоим заступлением: не лиши нас, Мати, честнаго покрова Твоего.

Песнь 4

Ирмос: Неизследный Божий Совет, / еже от Девы воплощения Тебе, Вышняго, / пророк Аввакум усмотряя, зовяше: // слава силе Твоей, Господи.

Естеством прост Сый, дарова ти, Михаиле, простоту благодатную, еже всем вся быти, да всяко спасеши некия.

Первосвятитель Петр, зря твоя и супружницы слезы о чадех, без времени усыпающих, сына вам молитвою дарует, емуже и тезоименнаго.

Отлагает житейская попечения Михаил честный, гонением на Церковь лютым наченшимся, яко Троицы служитель Живоначальныя.

Богородичен: Матерь Божия явилася еси, Чистая, Сына Превечнаго Рождеством, чад земных, Благодатная, не остави.

Песнь 5

Ирмос: От нощи утренююще, / вси немолчно Тя, Неприступный молим Свет: / Боже щедрый, // мир Твой, Христе, даруй нам.

Лентием Препоясанному и рабом нозе Умывающу подобяся, яко раб Владыце тако бдит Михаил о пастве, яко раб Христовых рабов.

Искупившаго ны от клятвы законныя, мысленныма очима зрел еси и среди тьмы безбожия, паки же, сораспявся Тому, всыновление истинное восприял еси.

Свидетельство твердое Христу принесл еси, Михаиле, сторицею дерзновение на небеси стяжав, пастырским предстательством огради нас, святе.

Богородичен: Яко во многия беды впадшии, недоумеем, како звати Тя, Пресвятый, но помилуй ны, Сыне Божий, молитвами Богородицы.

Песнь 6

Ирмос: Очищение нам, Христе, и спасение, Владыко, / возсиял еси от Девы, / да, яко пророка от зверя морскаго персей Иону, / от тли исхитиши // всего Адама всеродна падшаго.

Внегда скорбети пастве твоей о земли, запалением огненным сожигаемей, ты, села с молитвою обходя, ко Господу в болезни сердца взывал еси, и тако буйство пламене угашал еси.

Еже жити ти Христос бысть, и еже умрети приобретение, сего ради, Михаиле, радовался еси, егда многажды на испытания влечаху тя безбожнии, якоже древле иудее языков апостола.

Разорити конечне Церковь мняху богоборнии, яко и тебе, Михаиле, по пути тысящ собратий твоих сослану быти в землю безлюдну, обаче победою Божией возвратися нам подвиг святых новомученик.

Богородичен: Огради помышления наша, Дево Мати, яко Стену нерушиму обретохом Тя, стрелы вражия вся отражающую.

Кондак, глас 3:

Служения отча наследниче избранный, / пастве твоей образе мужества дивный, / сице взывал еси, досточудне: / не леть ми крытися пути Христова, / паки сугубое поприще мучения прошед, / престола Отца Небеснаго достигл еси, / Егоже моли, священномучениче Михаиле, // о верою и любовию чтущих тя.

Икос:

Духа смирения лишени, терпения истиннаго оскудехом зело, малодушием разслаблени, к доброделанию лениви явихомся, суетою омрачени, светлости свободы, Христом дарованныя, не прияхом, обаче подвигом твоим, Михаиле, озарихомся, сего ради и надеяние сердечное возложихом на тя. Помолися, отче, о верою и любовию чтущих тя.

Песнь 7

Ирмос: Юноши три в Вавилоне, / веление мучителево на буйство преложше, / посреде пламене вопияху: // благословен еси, Господи, Боже отец наших.

И нраву причастник быв, и слову Богоноснаго мужа апостольска последовав, яко некий клас Божий посекаешися изгнанием, паки и мучением сотираешися, да хлебом сладким Христу принесешися.

Лишений исполнено житие, людем смущенным, отъяту литургисанию, обаче ко Христу, умалену паче сынов человеческих, любовию исполняется душа Михаилова.

Юношам в пещи Вавилонстей, плотию плененным, душею же свободным, подражая, вопиял еси в злостраданиих, Михаиле, верно: благословен еси, Христе, Боже отец наших.

Богородичен: Благословен еси, Отче, Ходатаицу живота нам Деву Чистую избравый, благословен еси, Сыне, во спасение наше родивыйся из Нея, благословен еси, сошедый и освятивый Ю Душе Пресвятый.

Песнь 8

Ирмос: Отроки благочестивыя в пещи / Рождество Богородичо спасло есть; / тогда убо образуемое, / ныне же действуемое, / вселенную всю воздвизает пети Тебе: / Господа пойте дела // и превозносите Его во вся веки.

Видя яко ревнителя благочестия, Иларион со Матроною верныя сподвигаются защитити добраго пастыря, Богу уже избравшу сего в непорочную жертву о пастве.

Истязание лукаво, неправеден суд, изгнание тягостно, люто мучительство, смерть безчестна пред человеки: велик пред Богом вся претерпевый сия священномученик Михаил.

Юже возлюбил еси Церковь Небесную, Михаиле славне, Та и светло сретает тя страдальца венечника, свеселящуся полку новомученик.

Богородичен: Тя, Деву Святопервую, упование и радость нашу проповедуем, Мати Чистая, Сына Твоего превозносяще во веки вся.

Песнь 9

Ирмос: Яко одушевленному Божию Кивоту, / да никакоже коснется рука скверных, / устне же верных, Богородице немолчно, / глас Ангела воспевающе, с радостию да вопиют: // истинно вышши всех еси, Дево Чистая.

Прославляет тя достойно Един во святых славимый, убо помяни пред Ним поющия тя, Михаиле отче наш.

Образ буди новым людем твоим, время бо лукаво ныне, малодушия исполнено, от елеа твоего даждь, отче Михаиле, и нам.

Юность настави, зрелость утверди, старость утеши, яко надеяние стяжахом тя непостыдное, Михаиле, отче наш.

Щит веры восприимем, слова Божия мечем вооружившеся, внегда молитвою укрепит руки наша разслабленныя и колена разслабленныя утешит Михаил, печальник наш.

Имя твое славно и житие светло: прости убожество словес, восполни духа оскудение, Михаиле святе.

Богородичен: Христово стадо защити, Агнице, к духовным пажитем приведи, Чистая, молит Тя Михаил честный, молят вси новомученицы.

Светилен:

Светлостей святых достигнувый, путеводная звезда буди нам, Михаиле, к Путю и Свету Христу Господу.
Слава, и ныне: Отец благоволит, Сын раждается, Дух сходит, Дева Богородицею является, Ангели ликуют, праведницы веселятся и грешницы спасаются, вся тварь обновляется: се, новое небо и земля нова.

На хвалитех стихиры, глас 5.
Подобен: Радуйся, Живоносный Кресте:

Радуйся, Михаиле прехвальне, / благочестия столпе недвижимый, / православия свеча пламенеющая, / верных зарницами просвети мысленными, / у Господа испроси Всещедраго: / веси твоея духовное возрождение, / храма Троицы Святыя возсоздание, / новей пастве в вере утверждение, / от мирских соблазнов ограждение, // мир Христов и велию милость.

Радуйся, Михаиле предивне, / земли Можайския доброе прозябение, / новомученических
ликов похвало, / неба церковнаго пресветлая звездо, / верных молитвами твоими озари, / да по стопам твоим, путевожда неложнаго, / аще и среди нощи мира сего, / новыя люди Божия, во благом уповании / прейдут море житейское невреждени, // достигше обетованныя вечныя милости.

Радуйся, Михаиле премирне, / добродетелей зерцало: / смирения светлосте, / мужества ясный образе, / страдальче терпеливодушне, / правды Божия ревнителю, / самоотвержения правило, / верныя примером вдохновляяй, / надеждею спасения веселяй, // Исходатайствуй у Господа нам велию милость.

Грядите, празднолюбцы, / восхвалим учителя веры, / неотмирныя свидетеля надежды, / ученика любве Божественныя, / Михаила, пастыря добраго, / и агнца, за паству закланнаго, / возопиим к нему с верою, / надеждею исполнени непостыдною, / в дусе смиренныя сыновния любве: // умоли о нас Христа Самосущную Милость.

Слава, глас 3: Кто не удивится, Михаиле, / твоему пресветлому житию: / в вере церковней стоянию, / упованию на Бога крепчайшему, / терпению несокрушимому, / паче же дерзновению изрядному, / помолися, добрый пастырю, о нас, / да в сердцах наших, паки и в делех // запечатлеется дивный образ твой.

На литургии блаженны на 8, глас 4:

Стих: Блажени милостивии, яко тии помиловани будут.

Отлагает житейская попечения Михаил честный, / гонением на Церковь лютым наченшимся, // яко Троицы служитель Живоначальныя.

Стих: Блажени чистии сердцем, яко тии Бога узрят.

Лентием Препоясанному / и рабом нозе Умывающу подобяся, яко раб Владыце / тако бдит Михаил о пастве, // яко раб Христовых рабов.

Стих: Блажени миротворцы, яко тии сынове Божии нарекутся.

Еже жити ти Христос бысть, / и еже умрети  приобретение, / сего ради, Михаиле, радовался еси, / егда многажды на испытания влечаху тя безбожнии, // якоже древле иудее языков апостола.

Стих: Блажени изгнани правды ради, яко тех есть Царство Небесное.

И нраву причастник быв, / и слову Богоноснаго мужа апостольска последовав, / яко некий клас Божий посекаешися изгнанием, / паки и мучением сотираешися, // да хлебом сладким Христу принесешися.

Стих: Блажени есте, егда поносят вам, и изженут, и рекут всяк зол глагол на вы, лжуще Мене ради.

Лишений исполнено житие, / людем смущенным, отъяту литургисанию, / обаче ко Христу, умалену паче сынов человеческих, // любовию исполняется душа Михаилова.

Стих: Радуйтеся и веселитеся, яко мзда ваша многа на Небесех.

Истязание лукаво, неправеден суд, / изгнание тягостно, люто мучительство, / смерть безчестна пред человеки: / велик пред Богом // вся претерпевый сия священномученик Михаил.

Слава: Щит веры восприимем, / слова Божия мечем вооружившеся, / внегда молитвою укрепит руки наша разслабленныя / и колена разслабленныя утешит // Михаил, печальник наш.

И ныне: Христово стадо защити, Агнице, / к духовным пажитем приведи, Чистая, / молит Тя Михаил честный, // молят вси новомученицы.

Прокимен, глас 7: Восхвалятся преподобнии во славе / и возрадуются на ложах своих. Стих: Воспойте Господеви песнь нову, хваление Его в церкви преподобных.

Апостол к Римляном, зачало 99.

Аллилуия, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.

Евангелие от Иоанна, зачало 52.

Молитва

О славный Михаиле, добрый пастырю и истинный свидетелю Христов!

К тебе яко ходатаю теплому и поручителю верному пред Господем о нас, недостойных, прибегаем с упованием и молимся с любовию.

Ты от юности избрал еси учение духовное, да послужиши наставником и пастырем народу твоему: и ныне юных к вере истинней приведи, во благом учении настави и утверди, да страхом Божиим, хранением заповедей святых и духовным разумом отразят соблазны и поборют страсти от злых обычаев мира, похотей плоти и исконнаго врага диавола навеваемыя.

Ты на долзе времени, паки и среди мрака безбожия олтарю Святыя Троицы неленостно служил еси: тако и новей пастве твоей невреждение от духа века сего, свободу от недуга пианства, паче же в малем доброделании терпение у Господа испроси.

Ты во испытаниих, тя постигших, радостно проразумевал еси волю Божию, благую и совершенную, паки и славу, хотящую явитися во страданиих временных: и нас, в болезнех, скорбех и обстояниих сущих, добрым упованием огради, паче же славословием Творца всяческих души наша исполни.

Ты в лютую годину гонений противу закрытия церквей Божиих до конца мужественне стоял еси, паче же и в лютейшее лето на возсозидание обветшавшаго храма дерзнул еси: и нас благослови храм, в немже ты святыя молитвы многолетне возносил еси, мирне и благополучне возсоздати и благоукрасити в память твою.

Ты сугубое поприще заточений и изгнания за Христа прошел еси, паки и блаженныя кончины праведника удостоился еси: умоли Господа и нам многоскорбное поприще земнаго жития благодушне прейти, паче же и непостыдныя христианския кончины сподобитися, да вкупе с тобою, новомучениками Российскими и всеми святыми прославим Всесвятую Троицу и усердное Пречистыя заступление в безконечныя веки веков. Аминь.

Просмотров: 3049