Служба сщмч. Николаю Кандаурову

Служба сщмч. Николаю Кандаурову

Память 4(17) февраля

НА ВЕЛИЦЕЙ ВЕЧЕРНИ

По предначинательном псалме, Блажен муж: 1-й антифон.

На Господи воззвах: поставим стихов 8 и поем стихиры 3 праздника.
И священномученика стихиры 5, глас 2. Подобен: Егда от Древа:

Егда чете достохвальней/ во благочестии изрядных Андреа и Анны,/ мужеству и благодати тезоименных,/ утешение от Бога послася велие,/ рождшуся ти, досточудне Николае,/ истинно сии посвящают тя Господеви,/ да во время свое воспоеши всяким дыханием/ благодати Подателю и мужества// хвалы победный глас.

Егда помыслов шатание горькое/ обуяло люди русския,/ яко и в земли Кубанстей славней воинами,/ подвиги духа вернохрабрствующими,/ оскуде служение духовное,/ ты, богозванне Николае, Исаии пророку подобяся,/ се аз, посли мя, —/ духом Господу возопил еси// дерзновения верный глас.

Егда на Господа и на Христа Его/ ополчишася богоборнии,/ яко и самей державе сокрушитися,/ и царю и священником и младенцем незлобивым/ предатися убиению лютому,/ ты, Николае доблественне, паче укрепился еси духом,/ да храмы Божии и души человеческия/ священнолепне возродиши,// воспевая Христу Царю хвалы победный глас.

Не может град укрытися верху горы стоя,/ не мощно и человекоубийце диаволу/ обрести покой среде торжества славы Божия,/ сего ради попусти Господь скорби Николаю горчайшия,/ яко стрелы разжженныя сатанинския зависти:/ изгнание от семьи и паствы, паки и гладную супруги смерть./ Но и в боли пачеестественней/ не умолкает сего новаго Иова// плачевный Богови хвалы глас.

Подъемлеши, Николае терпеливнейше,/ якоже некий Симон Кириней,/ треблаженный, святе, крест Христов,/ да и чада твоя в нове гладе напитаеши,/ да и люди новыя укрепиши в терпении,/ да и душу твою конечне приуготовиши/ ко всеконечному на земли истязанию смерти лютыя,/ яже вход ти бысть в жизнь некончаемую// в нейже в лице Ангельстем слышимь есть победный твой глас.

Слава, глас 6:

Сиры не остави ны, отче,/ прииди стани с нами,/ настави, милостиве,/ како всем житием пети Христа// паки и твой любви к Нему подвиг.

И ныне: праздника.

Вход. Прокимен дне и чтения 3.

Пророчества Исаиина чтение:

Обратися от небесе, Господи, и виждь от дому святаго Твоего и славы Твоея:/ где есть ревность Твоя и крепость Твоя?/ Где есть множество милости Твоея и щедрот Твоих, яко терпел еси нам, Господи?/ Ты бо еси Отец наш, яко Авраам не уведе нас, и Израиль не позна нас,/ но Ты, Господи, Отец наш, избави ны, яко изначала Имя Твое на нас есть./ Почто уклонил еси нас, Господи, заблудити от пути Твоего?/ Ожесточил еси сердца наша, еже не боятися Тебе?/ Обратися раб Твоих ради, племен ради наследия Твоего./ Да помале наследствим гору святую Твою./ Противницы наши попраша святыню Твою. Быхом яко от начала, егда не владел еси нами, ниже назвася Имя Твое на нас./ Аще отверзеши небо, трепет приимут от Тебе горы и растаются, яко воск от лица огня тает./ И попалит огнь супостаты Твоя, и явлено будет Имя Твое противным Твоим./ От лица Твоего языцы возмятутся. Егда сотвориши славная, трепет приимут от Тебе горы./ От века не слышахом, ниже очи наши видеша Бога, разве Тебе, и дела Твоя истинна, и сотвориши терпящим Тя милость./ Срящет бо милость творящия правду, и пути Твоя помянут./ И ныне, Господи, Отец наш Ты еси, мы же брение; и Ты Создатель наш, и дела рук Твоих вси мы./ Не прогневайся на ны, Господи, зело, и да не помянеши во время грехов наших;/ и ныне призри, Господи, яко людие Твои вси мы.

Премудрости Соломони чтение:

Праведник аще постигнет скончатися, в покои будет./ Осудит же праведник умираяй живущия нечестивыя;/ узрят бо кончину праведнаго и не уразумеют, что усоветова о нем, и во что утверди его Господь:/ приидут бо в помышление согрешений своих ужасни, и обличит их противу беззакония их./ Тогда станет в дерзновении мнозе праведник, пред лицем оскорбивших его и отметающих труды его./ Видевше же его смятутся страхом многим, и ужаснутся о преславном спасении его./ И рекут в себе, кающеся:/ сей бе, егоже имехом некогда в посмех и в притчу поношения./ Безумнии, житие его вменихом неистово, и кончину его безчестну./ Како вменися в сынех Божиих, и во святых жребий его есть?/ убо заблудихом от пути истиннаго, и правды свет не облиста нам, и солнце не возсия нам./ Беззаконных исполнихомся стезь и погибели, и ходихом стези непроходны,/ пути же Господня не разумехом.

Премудрости Соломони чтение:

Похваляему праведнику, возвеселятся людие:/ безсмертие бо есть память его,/ яко от Господа познавается и от человек,/ и угодна Господеви душа его./ Возлюбите убо, о мужие, мудрость и поживете:/ восхощите ея и наказани будете./ Начало бо ея любы и соблюдение закона./ Почтите премудрость, да во веки царствуете./ Возвещу вам и не скрыю от вас таин Божиих,/ яко Той мудрости Наставник есть, и мудрых Исправитель,/ и всякому смыслу и делу Хитрец./ И всем смыслом научит мудрость,/ есть бо в ней Дух разумен и свят,/ и сияние Света присносущнаго, и образ благости Божия./ Тая други Божия и пророки устрояет,/ благолепнейши же есть солнца и паче всякаго сотворения звезд,/ свету сосуждаема, обретается первейши./ Тая угождающих ей от болезни избави/ и настави на стези правыя./ Даде им разум имети свят,/ и сохрани я от ловящих, и подвиг крепок подаде им./ Да разумеют вси, яко сильнейше всего есть благочестие,/ и никогдаже преможет злоба мудрости,/ ниже прейдет злыя обличающ суд./ Рекоша же в себе, помысливше неправедно:/ насильствуем праведному, и не пощадим преподобства его,/ ни усрамимся седин старости многолетны./ Будет бо нам крепость закон/ и уловим праведнаго,/ яко неугоден нам есть,/ и противится делом нашим, и поносит нам отпадение закона,/ и обличает нам согрешения наказания нашего./ Возвещает нам разум имети Божий,/ и отрока Господня себе именует./ Бысть нам на обличение помышлений наших/ и тяжек нам есть и видим,/ яко неподобно иным житие его, и изменены стези его./ В поругание вменихомся ему,/ и удаляется от путей наших, яко от нечистот,/ и блажит последняя праведных./ Увидим убо, аще словеса его истинна суть,/ искусим, яже сбываются ему./ Руганием и мукою истяжем его,/ да разумеем кротость его и искусим беззлобство его,/ смертию безобразною осудим его,/ будет бо посещение от словес его./ Сия помыслиша и прельстишася, ослепи бо я злоба их,/ и не разумеша таин Божиих и не разсудиша,/ яко Ты еси Бог Един, живота имеяй и смерти власть,/ и спасаяй во время скорби, и избавляяй от всякаго зла./ Щедр и милостив, и даяй преподобным Своим благодать,/ и Своею мышцею гордым противляяйся.

На литии стихиры, глас 7:

Се изгнание скончавается,/ во свое гнездо, Николае, тщишися,/ обретаеши чад сокрушение,/ гладом лютым изгибльшей матери,/ вопиющим птенцем шесточисленным:// не остави ны сиры, отче.

Се служение новое в Белой Руси/ отверзается скорбию новою,/ разверзающуся гладу тяжчайшему,/ токмо живу людей милосердию,/ выну тя любовию привечающим —/ кротка голубя, жертвенна пастыря,/ вопиющим птенцем шесточисленным:// не остави ны сиры, отче.

Се на поприще новое преселяешися/ во пределы земли Луховицкия/ паки светиши людем Божиим, грееши,/ по реченному благо деяти тщишися,/ духом зря истязание всеконечное,// се бо солнце позна запад свой.

Совнимати чад собираеши чтению,/ гласу отчу внимати сладкому,/ се, увы, конечное видение,/ се, увы, память жизни конечная,/ се внезапу внити спекулатором,/ разлучити всеконечне отца и чад,/ убиению того предати лютому,/ некасаемей обаче души мученика,/ возлетающу того духу в горняя,/ вопиющим птенцем безчисленным:// не остави ны сиры, отче.

Слава, глас 3:

Молитвами отеческими, о Николае,/ чада твоя ограждаются,/ храмы, идеже память чтится твоя,/ в новем благолепии возстают,/ се бо евангельски светлейше/ яко солнце во Царствии Отца// возсиял еси, святе, в просвещение наше.

И ныне, глас тойже:

Исполняему обетованию,/ лицезрит Симеон Славу Израиля,/ с миром старец от уз разрешается,/ се сияет ему среде смертныя тьмы// во откровение языков Свет.

На стиховне стихиры, глас 2.
Подобен: Доме Евфрафов:

Земле Кубанская,/ святовоспитавшая/ воинов — Руси защитников,/ чествуй воина духовнаго,// Николая священнаго.

Стих: Праведник яко финикс процветет,/ яко кедр, иже в Ливане, умножится.

Храмы Ставропольския,/ словом пастырским огласившиися,/ еже братоубийство пресещи,/ глас прославите дерзновенный сей// Николая священнаго.

Стих: Насаждени в дому Господни,/ во дворех Бога нашего процветут.

Соборе новомученик,/ Церкве Русския небесный личе,/ пой славословеньми/ сладкогласнаго пастыря// Николая священнаго.

Слава, глас и подобен тойже:

Бутово — врата небесная,/ страшнодивновеликая,/ кровию праведничею священная,/ паки величайтеся подвигом// Николая священномученика.

И ныне: праздника.

Тропарь, глас 1:

Пастырская свирель сладкогласия твоего/ собирает словесныя овцы/ еже внимати житию твоему, славне:/ како о благочестии подвиглся еси,/ како среде гонений храмы возсозидал еси,/ како претерпел еси скорби лютыя,/ како душу о Христе положил еси, о Николае,// сладчайший молитвенниче наш.

НА УТРЕНИ

На Бог Господь: тропарь праздника дважды. Слава: святаго. И ныне: праздника.

По 1-й стихологии седален, глас 2:

Телесныя исцели страсти,/ тугу душевную утеши,/ восполни духа оскудение,// не остави сиры, отче Николае.

Слава, и ныне: праздника.

По 2-й стихологии седален, глас 2:

Веси немощь нашу,/ малодушием разслабленных,/ веси и озлобление,/ укрепи на борющия ны,// крепкодушне Николае.

Слава, и ныне: праздника.

По полиелеи седален, глас 6:

О священном служении ревнуеши, Нико-лае,/ братоубийство лютое проповедию сечеши,/ храмы воздвизаеши/ и люди собираеши славити Христа,/ за Негоже кровь твою горячую лиеши,// Емуже и о нас ныне молишися.

Слава, и ныне: праздника.

Прокимен на утрени, глас 4:

Святым, иже суть на земли Его/ удиви Господь вся хотения Своя в них. Стих: Предзрех Господа предо мною выну,/ яко одесную мене есть, да не подвижуся.

Евангелие от Матфеа, зачало 36.

По 50-м псалме стихира, глас 6:

Святым, иже суть на Руси Святей,/ новомучеником преславным,/ удиви Господь хотение Свое,/ еже Церковь Русскую возродити/ дерзновенным сих ходатайством,/ сего ради о уделех своих умоляющу/ Николаю пречудному возопиим:// радуйся, новый священномучениче.

КАНОН, Глас 4.
Праздника на 4 и священномученика, егоже краегранесие сице:
Воздохни о нас дерзновенне отче Николае.

Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама// Амаликову силу в пустыни победил есть.

Велелепный цвет земли казаческия явился еси, чудне Николае, от корене прозяб богобоязненна, паки и храбрострадальческа.

Отеческу наследуя мужеству и боголюбию матере, от юности избираеши по вся дни жития теснейший путь евангельский.

Зрелость благочестия от юности, Нико-лае, являл еси ко всякому труду прилежанием, матере-вдовы вкупе и сироты-сестры кормильче.

Богородичен: Дщи фараонова пророка и вождя воспитует, от воды взятаго, Дева же Мариам ныне в церковь вносит рукою того воды Разделившаго.

Песнь 3

Ирмос: Лук сильных изнеможе,/ и немощствующии препоясашася силою,// сего ради утвердися в Господе сердце мое.

О крепости Николая юнаго, о мужества! Егда соль обуя, егда устыдишася пастырей сыны звания священнаго, духовному уче-нию прилепляется сей, матери премудре благословляющей.

Христа-Слова послушатель сый, Николае, изрядным чтением слова Божия к вышнему служению вкупе и свидетельству о Господе уготовляешися.

Невесте богоданней жених возрадовася Николай, Господу радующуся о крестозваннем браце сем, паки же доброплоднем и венценоснем.

Богородичен: И неслышен хвалы глас неплодныя древле Анны Богу слышимь и удобоответен есть, и иныя Анны Прозябение Чудный Грозд воздает ныне Насадителю твари.

Седален, глас 6:

Смертное осуждение имея в себе апостольски, Николае, убиения лютаго не убоялся еси, всю надежду полагая во Христе, мертвыя возставляющем.

Слава, и ныне: праздника.

Песнь 4

Ирмос: Вознесена Тя видящи Церковь на Кресте,/ Солнце праведное,/ ста в чине своем,/ достойно взывающи:// слава силе Твоей, Господи.

От силы в силу восходит Божиим званием Николай, от законоучения первее ко Стефанову чину, да сподобится во время свое и венца мучеников начальника.

Несть страха Божия пред очима суемудренных, — вопиет Николай, — несть пророка и вождя — се, вмужи мене в пастырстве, Добрый Пастырю, на безплотнаго противоборца.

Ангели не спеют души мучеников приимати, лютейшему гонению наченшуся, но се вмужается Николай на сокрушение скорое безплотнаго противоборца.

Сокрушаемым храмом богоборными, сокрушенным паки человеков сердцем, се вмужается Николай на сокрушение скорое безплотнаго противоборца.

Богородичен: Дщи Фануилева радостотворит люди, присно с ней вселенней радости, Богородице, вопиющей: слава силе Твоей, Господи.

Песнь 5

Ирмос: Ты, Господи мой, Свет в мир пришел еси,/ Свет святый, обращаяй из мрачна неведения// верою воспевающия Тя.

Елицы храмы, в руины претворенныя, вверяшеся ти, о Николае, к предней и лучшей лепоте сия возрождал еси.

Разсеянныя овцы любовию собирая свирелию чуднаго пения церковнаго, опустевшия твоя уделы в многолюдны, Николае пастырю, претворял еси.

Знамение благоволения являет Господь на рабе Своем, егда храмы возсозидает славный сей Николай, чада яко Божия мзда воздаются ему.

Богородичен: Неведения Исаиина разрешается мрак боговидением, и мы, Богомати, беззаконий наших свобождаемся причащением Сына Твоего пренебесных Таин.

Песнь 6

Ирмос: Пожру Ти со гласом хваления, Господи, —/ Церковь вопиет Ти,—/ от бесовския крове очищшися/ ради милости от ребр Твоих// истекшею кровию.

О трудов Николая пастыря, о мудрости, о долготерпения! Се во всех приключающихся ему волю зрит Божественную, благую и совершенную.

Восташа и на тя незлобива богоборнии, в веси отдаленней от семьи и паствы разлучают тя. Но во всех сих волю зриши Божест-венную, благую и совершенную.

Елену супругу дивную, гладом изгибльшую, возвращаяся, Николае, не обретаеши. Но во всех сих волю зриши Божественную, благую и совершенную.

Богородичен: Нетленный Един носим Неискусобрачней познавается старцем Младенец-Бог, да всего от тли спасет одряхлевшаго грехми человека.

Кондак, глас 3:

Гласу сладчайшему Пастыреначальника,/ еже душу полагати за овцы,/ последовал еси верно, святе Николае,/ усвояяся Христу крестоношением,/ даже до смерти за Него подвиглся еси,/ взывая непрестанно победным гласом:// с нами Бог и никтоже на ны.

Икос:

Кто, славне Николае, изречет труды твоя и болезни, яко и среде лютых гонений храмы Божии возсозидаеши, пение возрождаеши церковное, люди к житию во Христе привлекаеши, сам же тяжкия скорби и мученическую смерть претерпеваеши. Се бо во всех сих гремит победный твой глас: c нами Бог и никтоже на ны.

Песнь 7

Ирмос: В пещи авраамстии отроцы персидстей/ любовию благочестия паче,/ нежели пламенем опаляеми взываху:// благословен еси в храме славы Твоея, Господи.

Новый подвиг в пределех Белыя Руси отверзает ти святый Промысл, да и там среде глада душ и телес возсияет свет терпеливодушия твоего.

Еже на земли последний удел вверяет ти Подвигоположник Христос, да исполниши житием и смертию высокую меру Того возраста.

Отеческое сказание чадом прерывается того заключением, не могущей прерватися любви, ныне и во веки царствующей.

Богородичен: Тартара не страшится Симеон, не убоятся и новомученицы лютости богоборцев, благословяще, Пресвятая, Сына Твоего в храме славы Божественныя.

Песнь 8

Ирмос: На Кресте плотию пригвожденнаго/ и показавшаго нам оружие во спасение,// отроцы превозносите Христа, Бога нашего, во веки.

Человеконенавидение обрели есте, проклятейшии, — что суд, что истязания ваша, — се бо Христос освещает райский ми путь.

Еже жити ми Христос есть и еже умрети приобретение, сего ради и осуждение смертное приемлю, яко Божий дар в день рождества своего.

Ныне рабы Твоя, Владыко, с миром отпущаеши, — вопиют Николай, Иоанн вкупе и инии священномученицы, устреляеми безчеловечными, Ангелы же на небесех сретаеми.

Богородичен: И Тебе, Мати Чистая, паки оружие пройде душу, егда зрела еси страдания новых мученик, во веки Сына Твоего и Тя славящая.

Песнь 9

Ирмос: Сотвори державу мышцею Своею,/ низложи бо сильныя со престол/ и вознесе смиренныя Бог Израилев./ В нихже посети нас Восток с высоты// и направил ны есть на путь мира.

Кровь горячую излиял еси, боголюбиве, за Божественный Огнь, человеколюбием сошедший к нам и попаляющий грехи наша Кровию Божественною.

О любящих тя воздохни человеколюбием, имже еще в житии исполнился еси преизлишше, Николае, по дару Христа Человеколюбца.

Лику небесному приобщился еси, сладкогласне Николае, и чада приносят посильный ти и собратиям твоим долг — Бутовский храм новомученик.

Авраамово недро греет тя, славне Николае, да и нас сохранит отеческия твоея любве теплота, ныне убогую ти песнь скончавающих.

Богородичен: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.

Светилен:

Се Николай светильник ясен светит —/ се ко Христу стезя нам расширяется.

Слава, и ныне: праздника.

На хвалитех стихиры, глас 5.
Подобен:
Радуйся, Живоносный Кресте:

Радуйся, Николае мудре,/ храмоздателю искуснейший,/ положивый веру во основание,/ укрепивый паки строение надеждею,/ преукрасивый всяческая любовию,/ да, якоже Тримифунтским святителем,/ прославится в плинфе и во всяком дыхании// Троица Единосущная и Нераздельная.

Радуйся, Николае пребогате,/ богоданныя таланты умноживый/ труды премногими неусыпными,/ заповедей хранением тщательным,/ паки в лишениих долготерпением,/ ныне же воздаянием наслаждаешися:/ мерою Божиею преутрясенною,/ прославляя на лоне праведничи// Троицу Единосущную и Нераздельную.

Радуйся, преблаженне отче Николае,/ подражавый отцем великим вселенныя:/ Василию твердостию неколеблемою,/ кротостию Богослову,/ Златоусту же дерзновенною ревностию,/ паки терпением изгнания Афанасию,/ щедродушием Иоанну Милостиву,/ со апостолом в дусе вопия чадом твоим:// подражайте ми, якоже и аз Христу.

Радуйся, Николае прехвальне,/ чудным житием на земли просиявый,/ о часе конца помышлявый тщательно,/ имже подвиг твой запечатлевый/ славною кончиною мученика,/ да в вожделеннем свете жития вечнаго/ воспоеши вся Животворящую// Троицу Единосущную и Нераздельную.

Слава, глас 3:

Воспеваем подвиги твоя,/ величаем долготерпение,/ любвеобилию дивимся,/ святости образом утешаемся,/ на молитвы твоя уповаем,/ Николае отче наш,// кровь горячую за Христа излиявшаго.

И ныне: праздника.

На литургии
блаженны на 8, глас 4:

Стих: Блажени милостивии,/ яко тии помиловани будут.

Восташа и на тя незлобива богоборнии,/ в веси отдаленней от семьи и паствы разлучают тя./ Но во всех сих волю зриши Божественную,// благую и совершенную.

Стих: Блажени чистии сердцем,/ яко тии Бога узрят.

Елену супругу дивную, гладом изгибльшую,/ возвращаяся, Николае, не обретаеши./ Но во всех сих волю зриши Божественную,// благую и совершенную.

Стих: Блажени миротворцы,/ яко тии сынове Божии нарекутся.

Отеческое сказание чадом/ прерывается того заключением,/ не могущей прерватися любви,// ныне и во веки царствующей.

Стих: Блажени изгнани правды ради,/ яко тех есть Царство Небесное.

Человеконенавидение обрели есте, проклятейшии, —/ что суд, что истязания ваша, —// се бо Христос освещает райский ми путь.

Стих: Блажени есте, егда поносят вам, и изженут,/ и рекут всяк зол глагол на вы, лжуще Мене ради.

Еже жити ми Христос есть/ и еже умрети приобретение,/ сего ради и осуждение смертное приемлю,// яко Божий дар в день рождества своего.

Стих: Радуйтеся и веселитеся,/ яко мзда ваша многа на небесех.

Ныне рабы Твоя, Владыко, с миром отпущаеши, —/ вопиют Николай, Иоанн вкупе и инии священномученицы,/ устреляеми безчеловечными,// Ангелы же на небесех сретаеми.

Слава: Лику небесному приобщился еси,/ сладкогласне Николае,/ и чада приносят посильный ти и собратиям твоим долг — // Бутовский храм новомученик.

И ныне: Егда славнии новомученицы/ воздохнут о нас Богородице,/ уповаем Тою спасение улучити/ и возопити Благословенней:// Яже о всех благая Мати, слава Тебе.

Прокимен, глас 7:

Тебе ради, Господи,/ умерщвляеми есмы весь день. Стих: Вменихомся, якоже овцы заколения.

Апостол к Римляном, зачало 99.

Аллилуиа, глас 4:

Воззваша праведнии, и Господь услыша/ их, и от всех скорбей их избави их. Стих: Многи скорби праведным,/ и от всех их избавит я Господь.

Евангелие от Луки, зачало 106.

Молитва

О славне священномучениче Николае, отче наш богоданный и богопрославленный! К тебе припадаем, обремененнии грехми, к тебе взываем, скорбьми отягченнии. Воздохни о нас пред Спасом Христом, да не прогневается на нас, нерадивых и ленивых, прослези и пред Пречистою Материю Его,

да пробавит милость Свою на нас и вседержавным покровом Своим да защитит ны от враг видимых и невидимых. Вемы тя, отче святый, яко храмоздателя изряднаго, вемы тя добраго воистину пастыря, вемы и учителя терпения крайняго, вемы тя и мученика доблественнаго. Сего ради, подвигом жития твоего озареннии, души наша предаем молитвенному заступлению твоему, ныне и присно и во веки веков. Аминь.

Просмотров: 1358