Служба общая священномученику Бутовскому единому

На Велицей Вечерни

По предначинательном псалме, Блажен муж: 1-й антифон.

На Господи воззвах:
стихиры, глас 2. Подобен: Егда от Древа:

Законы Превечнаго уясняя, о ИМЯРЕК,/ поучая тем и проповедуя,/ Слова Божия таланты собирал еси/ во благой сокровищнице сердца,/ умножая сия богобоязненным житием,/ сего ради и призывает тя Христос/ на служение священное,/ да возсияет тобою верным// богоразумия нетленный свет.

Не мню, глаголет Златоустый,/ иереем многим спасенным быти./ О сем прилежно помышлял еси,/ досточудне ИМЯРЕК / обаче призванию Господню повинуяся,/ благодать пресвитерства восприемлеши,/ и благаго икономства дар,/ в немже является таинственно// Богоразумия нетленный свет.

Внимая себе и стаду,/ в немже Бог постави тя пастыря,/ откликался еси сердцем чутким/ на боли без меры страждущих,/ яже в сицевое время лютое без меры умножишася,/ и тако душу твою, ИМЯРЕК, уготовал еси/ ко искушению лютейшему темницею,/ в нейже возсия терпеливодушию твоему// Богоразумия нетленный свет.

Присным во едином Господе не бывает разлучения:/ аще бо и удаляешися искренних, о ИМЯРЕК,/ тяготою исполнен страдания,/ иже ти бысть от священноненавистников лютых,/ но по образу матере Моисеовой/ доверяеши сродных Богови,/ да преплывше жития сего мысленный Нил,/ вкупе достигнете плодоносныя земли райския,// идеже блистает богоразумия нетленный свет.

Слову Божию и деянием любве/ не бывает заключения, – / тако помышлял еси, ИМЯРЕК:/ аще бо и проповедь молчит,/  и доброделанию во узах места не обретается,/ обаче усугубляются молитвы,/ и в души смирившейся христоподражательне/ слышим есть благодати глас, яко хлада тонка, // еже есть богоразумия нетленный свет.

Слава, глас и подобен тойже: Бог приобщися ми и аз по силе Ему, – / взывал еси трепетом ИМЯРЕК,/ Бог пострада за мя, и аз за Него стражду,/ Бог из мертвых возста, да и аз воскресну/ к некончаемей жизни в Дусе Святе./ Но Родивыйся мене ради и Умерый,/ воскресение даруй духу моему,/ да во веки наслаждуся// Светом нетленным богоразумия.

И ныне:  (Богородичен)

Вход. Прокимен дне и чтения 3.

Проро́чества Иса́иина чте́ние:

Обрати́ся от небесе́, Го́споди, и виждь от до́му свята́го Твоего́ и сла́вы Твоея́:/ где есть ре́вность Твоя́ и кре́пость Твоя́?/ Где есть мно́жество ми́лости Твоея́ и щедро́т Твои́х, я́ко терпе́л еси́ нам, Го́споди?/ Ты бо еси́ Оте́ц наш, я́ко Авраа́м не уве́де нас, и Изра́иль не позна́ нас,/ но Ты, Го́споди, Оте́ц наш, изба́ви ны, я́ко изнача́ла Имя Твое́ на нас есть./ Почто́ уклони́л еси́ нас, Го́споди, заблуди́ти от пути́ Твоего́?/ Ожесточи́л еси́ сердца́ на́ша, е́же не боя́тися Тебе́?/ Обрати́ся раб Твои́х ра́ди, племе́н ра́ди насле́дия Твоего́./ Да пома́ле насле́дствим го́ру святу́ю Твою́./ Проти́вницы на́ши попра́ша святы́ню Твою́. Бы́хом я́ко от нача́ла, егда́ не владе́л еси́ на́ми, ниже́ назва́ся Имя Твое́ на нас./ Аще отве́рзеши не́бо, тре́пет прии́мут от Тебе́ го́ры и раста́ются, я́ко воск от лица́ огня́ та́ет./ И попали́т огнь супоста́ты Твоя́, и явле́но бу́дет Имя Твое́ проти́вным Твои́м./ От лица́ Твоего́ язы́цы возмяту́тся. Егда́ сотвори́ши сла́вная, тре́пет прии́мут от Тебе́ го́ры./ От ве́ка не слы́шахом, ниже́ о́чи на́ши ви́деша Бо́га, ра́зве Тебе́, и дела́ Твоя́ и́стинна, и сотвори́ши терпя́щим Тя ми́лость./ Сря́щет бо ми́лость творя́щия пра́вду, и пути́ Твоя́ помяну́т./ И ны́не, Го́споди, Оте́ц наш Ты еси́, мы же бре́ние; и Ты Созда́тель наш, и дела́ рук Твои́х вси мы./ Не прогне́вайся на ны, Го́споди, зело́, и да не помяне́ши во вре́мя грехо́в на́ших;/ и ны́не при́зри, Го́споди, я́ко лю́дие Твои́ вси мы.

Прему́дрости Соломо́ни чте́ние:

Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя;/ у́зрят бо кончи́ну пра́веднаго и не уразуме́ют, что усове́това о нем, и во что утверди́ его́ Госпо́дь:/ прии́дут бо в помышле́ние согреше́ний свои́х ужа́сни, и обличи́т их проти́ву беззако́ния их./ Тогда́ ста́нет в дерзнове́нии мно́зе пра́ведник, пред лице́м оскорби́вших его́ и отмета́ющих труды́ его́./ Ви́девше же его́ смяту́тся стра́хом мно́гим, и ужа́снутся о пресла́вном спасе́нии его́./ И реку́т в себе́, ка́ющеся:/ сей бе, его́же име́хом не́когда в посме́х и в при́тчу поноше́ния./ Безу́мнии, житие́ его́ вмени́хом неи́стово, и кончи́ну его́ безче́стну./ Ка́ко вмени́ся в сыне́х Бо́жиих, и во святы́х жре́бий его́ есть?/ у́бо заблуди́хом от пути́ и́стиннаго, и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели, и ходи́хом стези́ непрохо́дны,/ пути́ же Госпо́дня не разуме́хом.

Прему́дрости Соломо́ни чте́ние:

Похваля́ему пра́веднику, возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́:/ восхощи́те ея́ и нака́зани бу́дете./ Нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть, и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух разу́мен и свят,/ и сия́ние Све́та присносу́щнаго, и о́браз бла́гости Бо́жия./ Та́я дру́ги Бо́жия и про́роки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я угожда́ющих ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ я от ловя́щих, и по́двиг кре́пок подаде́ им./ Да разуме́ют вси, я́ко сильне́йше всего́ есть благоче́стие,/ и никогда́же премо́жет зло́ба му́дрости,/ ниже́ пре́йдет злы́я облича́ющ суд./ Реко́ша же в себе́, помы́сливше непра́ведно:/ наси́льствуем пра́ведному, и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н/ и улови́м пра́веднаго,/ я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий,/ и о́трока Госпо́дня себе́ имену́ет./ Бысть нам на обличе́ние помышле́ний на́ших/ и тя́жек нам есть и ви́дим,/ я́ко неподо́бно ины́м житие́ его́, и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася, ослепи́ бо я зло́ба их,/ и не разуме́ша та́ин Бо́жиих и не разсуди́ша,/ я́ко Ты еси́ Бог Еди́н, живота́ име́яй и сме́рти власть,/ и спаса́яй во вре́мя ско́рби, и избавля́яй от вся́каго зла./ Щедр и ми́лостив, и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На литии стихиры, глас 7:

Исполняются Духа пророчества/ область темная злонеистовствует,/ се терпения время, се страдания час,/ се Василий стенет Спасу Господу, / оживающей во устех, в сердце, в дусе его// приснопеваемей Псалтири Давидовей.

Нечестивых совет всегубительный,/ вихор Каинов, дух отступления/ возметает прах смертный прельщенных душ/ от лица святыя земли, Церкве Божия – / се взывает ИМЯРЕК в смирении –/ Ты же, Господи, веси пути моя,// убо волю мою в законе Твоем укорени.

На Господа, на Христа Его,/ на Церковь Святую Русскую/ князи людстии собираются,/ се воистину шатание суетно, – / вопиет ИМЯРЕК в терпении, – / яко стрелы младенец оных язвы есть,// се бо Живый на Небесех поругается им.

Умножаются нам стужающии,/ востающе на ны и глаголюще,/ яко в Спасе – Бозе и Господе/ несть спасения, ни заступления, –/ аз же вем Тя, о Многомилостиве, – / вопиет ИМЯРЕК мужаяся – / сего ради терплю поношение/ вкупе сродников разлучение нуждею ,// яко Ты еси возносяй главу мою.

Слава, глас тойже: Наказуя мя, наказуеши, / не предаждь убо душу гибели,/ сам избави ю, Сам очисти ю, – / се зовет ИМЯРЕК ко Спасу всех,/ дерзновением исполняяся,/ искушен судищем, темницею,/ воздыхает слезя мужемудренно: / имже веси образом злострадания// пред Тобою путь исправи мой.

И ныне, глас тойже: Мати Дево Боголюбивая,/ новомученик дерзновение,/ мир ИМЯРЕК и собратиям его/ от небесных высот низпославшая,/ в час конечнаго испытания – / убиения в лютом Бутове,/ в сладость вечнаго наслаждения,/ в дар священнаго предстояния/ за ны, горце грехми отягченныя,/ не лиши покрова Твоих рабов,// яко миру родила еси Начальника тишины.

На стиховне стихиры, глас 2.
Подобен:  Доме Евфрафов:

Земле ИМЯРЕК1,/ крин святый прозябшая,/ подвигом того красуйся днесь,/ в Бутове ссеченнаго,// святолепнаго ИМЯРЕК.

Стих: Праведник яко финикс процветет,/ яко кедр, иже в Ливане, умножится:

Храме Воскресения// на скале воздвигнутый/ веры новых мученик,/  пасху чти страдания,// - священнаго ИМЯРЕК.

Стих: Насаждени в дому Господни,/ во дворех Бога нашего процветут:

Соборе новомученик Бутовских,/ злато Церкве Русския,/ светло просияй днесь/ таланта блистанием// святолепнаго ИМЯРЕК

Слава, глас и подобен тойже: Христозваннии людие,/ бодрствуим в молитвах,/ се бо ввери ны Господь/ неусыпающу ходатаю,// священному ИМЯРЕК

И ныне: Богородичен

Тропарь, глас 4

Нивы церковныя благодатный клас/ Плод сторичный яве приносит,/ Воспитуя глаголом духовным верныя,/ Вся претерпевая злострадания и смерть за Христа/- В недра полагаем священныя Бутовския земли/ Дерзновение приемлет сугубое на небесех ИМЯРЕК// Еже молитися о душах наших/

НА УТРЕНИ

На Бог Господь: тропарь святаго дважды, Слава и ныне: Богородичен

По 1-й стихологии седален, глас2:

Теле́сныя исцели́ стра́сти,/ ту́гу душе́вную уте́ши,/ воспо́лни ду́ха оскуде́ние,// не оста́ви си́ры, о́тче ИМЯРЕК.

Слава и ныне: Богородичен

По 2-й стихологии седален, глас2:

Ве́си не́мощь на́шу,/ малоду́шием разсла́бленных,/ ве́си и озлобле́ние,/ укрепи́ на борю́щия ны,// крепкоду́шне ИМЯРЕК.

Слава и ныне: Богородичен

По полиелеи седален, глас2:

Маловерием разслаблени,/ скорбьми, яко непосильными, соугнетаемся,/ сего ради к тебе, прибегаем, отче наш ИМЯРЕК,/ да верою укрепимся заступлением твоим,/ и в терпение облечемся,// николиже постыжающее.

Слава и ныне: Богородичен

Прокимен на утрени, глас 4: Святым, иже суть на земли Его удиви Господь вся хотения Своя в них. Стих: Предзрех Господа предо мною выну, яко одесную мене есть, да не подвижуся.

Евангелие от Матфея, зачало 36.

По 50-м псалме стихира, глас 6:

Святым, иже суть на Руси святей,/ новомучеником преславным,/ удиви Господь хотение Свое,/ еже Церковь Русскую возродити/ дерзновенным сих ходатайством,/ сего ради о уделех своих умоляющу/ ИМЯРЕК пречудному возопиим:// Радуйся, новый священномучениче.

Канон священномученика, глас 4,
егоже краегранесие сице: Прославляющих тя помяни, отче преславне.

Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама// Амаликову силу в пустыни победил есть.

Плач на плач прилагает ИМЯРЕК ко Господу, прелагающу Тому плач теплый в победное пение.

Рекут безумнии яко Бога несть – Упования отец наших – возврати, о Сильне, пленение раб Твоих.

Омерзишася в начинаниих безчеловечнии; да не убоимся страха их, яко несть нам страха, разве Тебе, Судие Праведнейший.

Богородичен: Сиры не остави ны, овец взыскание,  терпение пастырей, о Мати Агнца и Пастыря.

Песнь 3

Ирмос: Лук сильных изнеможе,/ и немощствующии препоясашася силою,// сего ради утвердися в Господе сердце мое.

Лук зверонравнии напрягоша состреляти верныя Твоя: да свершатся нозе наша яко елени, на горней высоте утвержденнии.

Апостол увещавает немощи носити немощных: се любы Христова, еюже истлевающий мир осоляется.

Велий Господь наш, несть числа разуму Его, убо смиримся под руку Святаго Крепкаго.

Богородичен: Любовию воспоим, яже о Христе братия,  и всеконечне упование возложим на Предстательницу нашу и Матерь Божию.

Седален, глас 6:

Овцы своя глашая по имени,/ образ тем являя внимания Христу,/ таже гласу Началопастыря последуя,/ душу за паству положил еси,/ о ИМЯРЕК предобрый пастырю,// паки и мучениче доблественный.

Слава и ныне:  Богородичен

Песнь 4

Ирмос:  Вознесена Тя видевши Церковь на Кресте,/  Солнце праведное,/ ста в чине своем,/ достойно взывающи:// слава силе Твоей, Господи.

Яко овощныя хранилища вмениша храмы Твоя, Всецарю, ихже явил еси рукотворныя проповедницы смирения Иисусова.

Юже Дом Богородицы именовахом, зрим ныне Русскую землю, яко вертеп разбойничь, се, увы, горькая измена десницы Вышняго.

Щедродателю Милостиве и Судие Всеистиннейший, виждь немощь и смирение  наше, убо суд на милость преложи.

Богородичен: И древних гонителей злобою превозшедше отступницы богоборныя, рыкают львообразно на ны, не ведуще Тя, о Мати, Заступницу Боголюбивую.

Песнь 5

Ирмос: Ты, Господи мой, Свет в мир пришел еси,/ Свет святый, обращаяй из мрачна неведения// верою воспевающия Тя.

Христос искушашеся, тако и во Христа облекшимся испытание предлежит, аще Словом живем, исходящим из уст Божиих.

Тма и тартар ошуюю Судии, убо изберем Света десную часть, из мрачна неведения обращающа.

Яко отреби миру быхом, доселе попираеми есмы, восплачим зде со плачущими, да радость безконечную улучим.

Богородичен: Плач утоли гладом томимых чад, Словом Божиим мир насыщающая, о Питательнице алчущих.

Песнь 6

Ирмос: Пожру Ти  со гласом хваления, Господи, – / Церковь вопиет Ти,/ от бесовския крове очищшися/ ради милости от ребр Твоих// истекшею кровию.

О падения! О отступства окаяннаго! О дерзости неблагодарнаго народа Твоего! Доколе терпиши, о Едине Долготерпеливе?

Мир глаголют быти и се мира несть, Патриарх со пророком вопиет, убо мира Твоего не лиши ны среде тли злопагубныя.

Яму ископаша верным Твоим, Спасе, в нюже да впадут врази Креста, аще несть покаяния им.

Богородичен: Непорочная, взыщи блудныя, укрепи терпящия, Необоримая, о усопших умоли, Неусыпающая, рая сподобляющи тех, о Нетленная.

Кондак, глас 6:

Благодать священства восприим,/ на небошественное поприще подвиглся еси, ИМЯРЕК,/ жизнию и смертию о Господе проповедуя// мир Христов, всяк ум преимущ.

Икос:

Яко духовнаго воина и пастыря всеизрядна, обретохом тя, ИМЯРЕК отче наш, вооруженна мечем слова Божия, подвигом же честнаго страдания шлем спасения восприимша, благовествующа новым чадом церковным мир Христов, всяк ум преимущ.

Песнь 7

Ирмос: В пещи авраамстии отроцы персидстей/ любовию благочестия  паче,/ нежели пламенем опаляеми взываху:// благословен еси в храме славы Твоея, Господи.

Искренним разлучение судиши, да никтоже от них погибнет, якоже Сам, о Иисусе, дея учил еси.

О храмех заключаемых люте безбожным неумолимым, умолен буди, Иисусе Сыне Отечь, да поне правнуцы наша возродят оныя.

Тесноты душевныя горечь и судище злосоветное, паки и за веру смерть, аще благоволиши, Спасе, да не разлучат смиренный дух мой от любви пресладкия Твоея.

Богородичен: Чудес источниче Дево и Мати, миром напои истаявающия  крепостию, да безчеловечных ополчения верою низложим.

Песнь  8

Ирмос: На Кресте плотию пригвожденнаго/ и показавшаго нам оружие во спасение,// отроцы превозносите Христа, Бога нашего, во веки.

Емшим ны беззаконным, в дерзновении возопиим: аще и пастырей поразисте и овцы разсеяшася, но долготерпим, да поборет за ны Победитель смерти.

Плач исполняется ИМЯРЕК, исполняему того житию, да исполнятся безвестная и тайная, Спасе, всеблагаго о нас Промысла Твоего.

Рыдание ныне приложим на рыдание, плачущеся  ИМЯРЕК приснопамятнаго, осужденнаго убо на смерть, жизни же всенеплачевныя свидетеля, Бог бо судит рабом Своим, подавая венец нетленный.

Еже жи́ти Христо́с ти бысть и е́же умре́ти приобре́тение, сего́ ра́ди и сме́ртную страсть приносиши, ИМЯРЕК, я́ко дар Распяту о всех, паки и Животворящу вся.

Богородичен: Се раба Господня – рекла еси ко Архангелу, Чистая, и мене сим смирением просвети, снизхождением Духа.

Песнь  9

Ирмос: Сотвори державу мышцею Своею, низложи бо сильныя со престол и вознесе смиренныя Бог Израилев. В нихже посети нас Восток с высоты и направил ны есть на путь мира.

Люто утеснение в житии, лютейше судилище безчеловечное, всех лютейшее убиение без числа страдальцев в лютом и святейшем селе Русския земли – Бутове.

Ад Бутова в рай претворися ИМЯРЕК и собратиям его, возсия и нам спасения надежда, се бо воистину кровь мучеников семя Церкве есть.

Во светлостех святых водворяешися духом, ИМЯРЕК, телом же во святоисполненней Бутовстей земли, просвети убо духовне и нас, ныне убогую ти песнь скончавающих.

Наследник убо небесных и блаженства оных причастник быв, помолися тепле о воспевших плач и подвиг твой на земли, ИМЯРЕК.

Богородичен: Егда славнии новомученицы воздохнут о нас Богородице, уповаем Тою спасение улучити и возопити Благословенней: Яже о всех благая Мати, слава Тебе.

Светилен:

Хлад отогрей оляденевшия души моея и тьму страстную разжени, Христе Светодавче, ИМЯРЕК молитвами теплыми, светлаго страдальца Твоего.

Слава и ныне: Богородичен

На хвалитех стихиры, глас 5.
Подобен:
Радуйся:

Радуйся, ИМЯРЕК предобре,/ издетска чисте восприимый/ Авелеву щедрость душевную,/ Самуилово послушание,/ жертвенность Исаакову,/ прилежание в трудех Иаковле,/ долготерпение Иосифово,/ сего ради учение истины// запечатлел еси подвигом святаго жития.

Радуйся, ИМЯРЕК премудре,/ зрел явивыйся от юности разумом:/ не довлело бо ти внешним учение,/ но духовных востязуя смыслы,/ обрел еси реку премудрости в слове Божием,/ от неяже паству напаял еси,/ да николиже вжаждут// во пустыннем зное мирскаго жития.

Радуйся, ИМЯРЕК пребогате,/ обнищавшему нас ради послуживый честне,/ вверенныя ти люди ущедряя/ призыванием милости Всещедраго,/ да не одолеет сих уныния дух,/ но держатся веры Вседержителевой/ и паки надеждею на Того исполнени,/ обретут любве пристанище утишное// среде ненадежного моря земнаго жития.

Радуйся, ИМЯРЕК прехвальне,/ добре ведый, паче же проповедавый,/ яко несть любве совершеннее,/ да кто душу чисте положит за други,/ и сия крепчае уяснивый опытне,/ егда  подвигом страдания доблественнаго/ исполнил еси меру возраста// Христа распятаго и воскресшаго.

Слава, глас 3: Песнословим твое житие,/ величаем страдания,/ ублажаем и смерть за Христа,/ надеждею укрепляемся/ на отеческия молитвы твоя,// священномучениче ИМЯРЕК отче наш.

И ныне: Боголюбской

 

На Литургии
блаженны на 8: Боголюбской 4 и сии священномученику,  глас 4:

Стих: Блажени есте, егда поносят вам, и изженут, и рекут всяк зол глагол на вы, лжуще Мене ради.

Се святилища в запустении, разграблению храмы преданы, зрит ИМЯРЕК сие содеваемое, плача зрит сему исполняющуся: горше всех запустение душ людских, до конца совести их сожигаемей.

Стих: Радуйтеся и веселитеся, яко мзда ваша многа на Небесех.

Cе не в мудрости человечестей, ни в словесных хитросплетениих истязуется любовь пастырская, житием сие, ИМЯРЕК, свидетельствовал еси, но в смирения истинней простоте, еже всем вся быти, да спасти всяко некия.

Слава: Се приятием плоти сложился еси мне, Иже прост естеством Сыне Божий, – воздыхал еси Спасу, ИМЯРЕК, – да и аз в простоте Ти послужу, вкупе и словесному Твоему стаду: и тако принесу посильный Тебе долг, еже душу за Тя и тех положити.

И ныне: Се раба Господня – рекла еси ко Архангелу, Чистая, и мене сим смирением просвети, снизхождением Духа.

Прокимен, глас 7: Восхвалятся преподобнии во славе и возрадуются на ложах своих. Стих: Воспойте Господеви песнь нову, хваление Его в церкви преподобных.

Апостол к римляном, зачало 99.

Аллилуия, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.

Евангелие от Иоанна, зачало 52.

Молитва священномученику

О славне священномучениче ИМЯРЕК, отче наш богоданный и богопрославленный! К тебе припадаем, обремененнии грехми, к тебе взываем, скорбми отягченнии. Воздохни о нас пред Спасом Христом, да не прогневается на нас, нерадивых и ленивых, прослези и пред Пречистою Материю Его, да  пробавит милость Свою на нас и  вседержавным покровом Своим да защитит  нас от враг видимых и невидимых. Вемы тя, отче святый, изряднаго благочестия учителя, вемы тя яко добраго воистину пастыря, вемы тя и мученика доблественнаго. Сего ради, подвигом жития твоего озареннии, души наша предаем молитвенному заступлению твоему, ныне и присно и во веки веков. Аминь.

Просмотров: 2031