Служба Собору Бутовских мучеников

Служба Собору Бутовских мучеников

Память в 4-ю субботу по Пасце и 26 июля(8 августа)

На Малой вечерне

На Господи воззвах:
Стихиры мученикам - 4, глас 2, подобен *Егда от древа*:

Возмечтав диавол одолети древле Церковь,/ Низпаде, предерзый, от Нея поругаем,/ Любовию обжегся первомученик римских,/ Таже воинов великих Димитрия, Георгия,/ Милостивых же мудростию святителей/ Преподобных смирением пустынников,/ Дерзновенных о Господе всех от века святых,/ В нихже славою новосияют нетленною/ Страдальцы священнаго Бутова,/ Сонм великий свидетелей Истины:/ Наше рыдание по человеку и жалость,/ Наше о Христе упование,// Наши похвала и пение./

На селе безсмертнаго воистину Косова/ Воинства прекраснаго премудрый Лазарь вождь/ Избирает славу Небеснаго Царства/ Прием христоподражательне на земли горчайшую смерть,/ Таже мученицы Бутовстии,/ Серафимом священноводимые стратигом-Святителем,/ Избирают прекрасне умрети за Христа,/ Устреляеми от горчайших мучителей,// Да соцарствуют святым и о нашем смирении молятся./

Тьмами древле урезашася янычарами тифлисцы/ За еже не сквернили образ Божий рукописанный/ Тьмами же тем без меры ныне/ Страждут на Руси новомученицы/ За еже образ нерукотворенный Христов/ Сохраниша в себе самех,/ В нихже славни явишася страдальцы Бутовстии -/ Множайшии числом, дивнии же образом,// Житием и смертию христоподобни и памятию

Страданием еже на мирстем торжищи/ Покровитель Солуни является/ Славнаго от апостол града мудрая глава,/ Мироточный Димитрий мученик -/ Убо и Руси Святей возрождаемей,/ От конец ея премудре Богом собраннии,/ Предстателие явишася страдальцы Бутова,/ Главы мирскому не преклонившии князю -// Со апостолы и мученики милость велию источают нам/

Слава, гл. 1: Всемирную славу,/ от Руси являемую в Бутове/ высшаго еже на земли подвига, о мученицы,/ вознесосте Господу во время новое,/ се бо гром устреляния вашего/ ехом премирным отдается/ в сече великаго Косова,/ в урезании без числа тифлисцев верных,/ в катакомбах Рима и Солунском торге,/ во свидетельствах неба всех времен от всея земли/ на Голгофе Божественней.

И ныне, Преполовению, или догматик, гл.1 : Всемирную славу:

Стихиры на стиховне, гл.2,
подобен «
Доме Евфрафов»:

Бутово - земле дивноглубокая,/ Златом Церкве преисполненная/ От сокровищ Царства Божия, -/ Недр яви богатство вышнее -// Славу новых мучеников./

Тебе ради, Господи/ умерщвляеми есмы весь день:

Бутово - юдоль страшноплачевная,/ Кровми святосеянная,/ Слезы мирными орошенная,/ Жизни вечныя прозябни класы -// Любовию новых мучеников./

Вменихомся/ якоже овцы заколения:

Бутово – премирный саде -/ Древний цвет взрастивший/ Жизни новыя свидетелей, -/ Плодопринеси смирение нам// Терпеливодушием мучеников./

Слава, глас и подобен тойже: Бутово врата небесныя,/ Страшнодивновеликия,/ Кровми праведник священныя,/ Отверзай божественныя входы верным// Дерзновением святых мучеников/

И ныне, глас и подобен тойже: Сень новую обретшая в Бутове,/ Сень свята, Державная Владычице, -/ Собирай в священный кров люди Божия, -/ Ты бо немощных Печальница// И упование мучеников/

Тропарь, глас 4

Всуе шатается богоотступных соборище, На Христа востает древней лютостию, Устрелянием убо тщится дерзостне Христоносных в Бутове мученик одолети, Но всеславное тех Серафимово воинство, Всеоружие восприим Креста, Утверждает веру ревностию, Упование страстотерпчеством, Водворяяся в Царстве всепобеждающия любве

Тропарь ин, глас 4

Нивы церковныя класы безчисленныя/ Плод сторичный яве приносят/ Смертною в Бутове страдою за Христа/ Паки же сеются во укоренение веры/ Укрепляют ны надеждею небесных/ Добропобедныя свидетелие Истины и Любви/ Дерзновеннии о нас ко Христу молитвенницы/ Се воистину кровь мученическая// Семя Церкве есть/

На Велицей Вечерни

По предначинательном псалме: Блажен муж: 1-й антифон.

На «Господи воззвах»
поставляем стихов 10 ( аще Преполовение),
аще 26 иулия – точию самогласны, повторяюще:

4 воскресны, глас 3:

Твоим Крестом, Христе Спасе,/ смерти держава разрушися,/ и диаволя прелесть упразднися,/ род же человеческий, верою спасаемый,/ песнь Тебе всегда приносит.

Просветишася всяческая / Воскресением Твоим, Господи, / и рай паки отверзеся, / вся же тварь восхваляющи Тя, / песнь Тебе всегда приносит.

Славлю Отца и Сына силу/ и Святаго Духа пою власть/ нераздельное несозданное Божество,/ Троицу Единосущную,/царствующую в век века.

Страстию Твоею, Христе,/ омрачивый солнце,/ и светом Твоего воскресения/ просветивый всяческая,/ приими нашу вечернюю песнь Человеколюбче.

И мучеником – 6, самогласны :

Гл.2 (Киевский распев):

Людие злочестивии и беззаконнии/ вскую поучаются тщетным:/ вскую неповинных истязуют яростию,/ вскую же онех сна и пищи лишают,/ паки же раны биеньми наносят,/ вскую же тысящми осуждают на смерть:/ но приемлют сия страстотерпцы смирением,/ в памяти о распятом Иисусе-Господе/ сего ради язвы Его носяще в телеси,/ устреляются люте в веси Бутовстей,/ воспевающе духом вечнующую песнь:// слава, Господи, Кресту Твоему и воскресению Твоему.

Наследницы Варравы-убийцы,/ восхитивше область еже беззаконновати,/ яко ковы указы куют насмертныя/ неповинным, преистязанным, преотчаянным,/ избирают же веси убийственныя,/ в нихже Бутово горце первенствует/ тьмами жертв, пожираемых лютостию,/ но приемлют смерть предостойне мученицы,/ нивочтоже вменив козни вражия,/ воспевающе победную песнь Агнцу Божию:// слава, Господи, Кресту Твоему и воскресению Твоему.

Глас 7:

Ужас бе видети/ страстотерпцев болезнь изведавших/ не имущих доброты видения/ в телесех, преисполненных ранами,/ очесем слезоточным о сродницех,/ ушесам от хулений незамкнутым,/ гортанем иссохшим жаждею,/ паче же дышущим верою сердцам,/ яко сице, в безмерней немощи/ совершается сила Божия.

Глас 3:

Вне родных домов заключаются исповедницы,/ вне темниц ожиданием томятся оных сродницы/ за Христа, Изгнанника Божественнаго;/ вне града изводятся мученицы на смерть,/ да свидетельство принесут Агнцу Божию,/ вне врат пострадати изволившу:/ Доколе не судиши Владыко,// Святый и Истинный!

Исполняются чад и внуков моления/ обретается место страдания вашего, мученицы,/ место общаго упокоения/ во святейшем месте Святыя Руси./ Се завет от Господа, вами исполненный,/ се и нам наказ от священнаго Бутова:/ буди верен до смерти// и обрящеши венец живота.

Гл.2 (Киевский распев):

Что зримое видение?/ Кое настоящее упокоение?/ В рове Бутовстем субботствуют мученицы/ новую являюще нам жизнь/ духа силою, победной над смертию,/ дерзновением воздыхая и о нас Христу:/ Воскреси в оных ревность любве Твоея,/ яко Ты царствуеши во веки,/ неизмерную имеяй велию милость.

Слава, глас 6 (аще суббота Преполовения):

Днешний день таинственно патриаршею десницею избра Бог. Сия бо есть благословенная суббота, сей есть преполовения день, воньже память творим мучеников Бутовских, страдальцев безчисленных Голгофы русския, яко плод принесших Богу терпения подвиг, зде почивших от земных своих дел, смотрением еже на смерть плотию субботствовавших: паки же мощми возвращщихся нам в месте общаго упокоения, воскресению Христову общницы бывше - Единаго Благаго и Человеколюбца

И ныне: Догматик, гл.3: Како не дивимся:

(Аще 26.7): Слава, глас 6:

Сей день воистину страшный и славный вкупе:/ Се зачало устрелянием в Бутове:/ Се, являему пребезумию человекоубийц,/ Преподобие Господу свидетельствуется/ Верных сынов и дщерей человеческих,/ Смертию проповедающих жизнь:/ Се, ново зачало в Бутове Евангелия// Иисуса Христа Сына Божия./

И ныне: Догматик, гл.6 : Кто Тебе не ублажит:

Вход, прокимен дне и чтения 3:

Плача Иеремиина чтение:

Помяни, Господи, что бысть нам: призри и виждь укоризну нашу: достояние наше обратися к чуждим и домы нашя ко иноплеменником: сири быхом, несть отца, матери нашя яко вдовы. Воду нашу за сребро пихом, дрова наша за цену куповахом: на выя нашя гоними быхом, трудихомся, не почихом. Египет даде руку, Ассур в насыщение их. Отцы наши согрешиша, и несть их, мы же беззакония их подъяхом. Раби обладаша нами, избавляющаго несть от руку их. В душах наших носихом хлеб наш, от лица меча в пустыни. Кожа наша аки пещь обгоре, разседошася от лица бурей глада. Жен в Сионе смириша, девиц во градех Иудиных. Князи в руках их повешени быша, старейшины не прославишася. Избраннии плачь подяша, и юноши в кладе изнемогоша. И старцы от врат оскудеша, избраннии от песней своих умолкоша. Разсыпася радость сердец наших, обратися в плачь лик наш, спаде венец со главы нашея: горе нам, яко согрешихом. О сем смутися сердце наше, о сем померкнуша очи наши. На горе Сионе, яко погибе, лисицы ходиша. Ты же, Господи, во веки вселишися, престол Твой в род и род. Вскую во веки забываеши нас, оставиши ли нас в продолжение дний? Обрати ны, Господи, к Тебе, и обратимся, и вознови дни нашя якоже прежде. Яко отревая отринул еси нас, разгневался еси на ны зело.

Пророчества Иеремиина чтение:

Господи, скажи ми, и уразумею: тогда видех начинания их. Аз же, яко агня незлобиво ведомо на заколение, не разумех, яко на мя помыслиша помысл лукавый, глаголюще: приидите и вложим древо во хлеб его и истребим его от земли живущих, и имя его да не помянется ктому. Господь Саваоф, судяй праведно, испытуяй сердца и утробы, да вижду мщение Твое на них, яко к Тебе открых оправдание мое. Сего ради сия глаголет Господь на мужы Анафофски ищущыя души моея, глаголющыя: да не пророчествуеши о имени Господни, аще ли же ни, умреши в руках наших. Сего ради сия глаголет Господь Сил: се, Аз посещу на них: юноши их мечем умрут, и сынове их и дщери их скончаются гладом, и останка не будет от них, наведу бо злая на живущыя во Анафофе в лето посещения их. Праведен еси, Господи, яко отвещаю к Тебе: обаче судбы возглаголю к Тебе: что, яко путь нечестивых спеется, угобзишася вси творящии беззакония? Насадил еси их, и укоренишася, чада сотвориша и сотвориша плод: близ еси Ты уст их, далече же от утроб их. И Ты, Господи, разумееши мя, видел мя еси и искусил еси сердце мое пред Тобою: собери их яко овцы на заколение и очисти их в день заколения их. Доколе плакати имать земля, и трава вся селная изсхнет от злобы живущих на ней? Погибоша скоти и птицы, яко рекоша: не узрит Бог путий наших. Нозе твои текут и разслабляют тя: Идите, соберите вся звери селныя, и да приидут снести е. Пастырие мнози растлиша виноград Мой, оскверниша часть Мою, даша часть желаемую Мою в пустыню непроходную, положиша в потребление пагубы. Яко сия глаголет Господь о всех соседех лукавых, прикасающихся наследию Моему, еже разделих людем Моим Израилю: се, Аз исторгну их от земли их и дом Иудин извергну от среды их: и будет, егда исторгну их, обращуся и помилую их, и вселю их когождо в достояние свое и когождо в землю свою.

Пророчества Иезекиилева чтение:

Бысть на мне рука Господня, и изведе мя в дусе Господни и постави мя среде поля: се же бяше полно костей человеческих: и обведе мя окрест их около, и се, многи зело на лицы поля, и се, сухи зело. И рече ко мне: сыне человечь, оживут ли кости сия? И рекох: Господи Боже, Ты веси сия. И рече ко мне: сыне человечь, прорцы на кости сия и речеши им: кости сухия, слышите слово Господне: се глаголет Адонаи Господь костем сим: се, Аз введу в вас дух животен и дам на вас жилы, и возведу на вас плоть и простру по вам кожу, и дам дух Мой в вас, и оживете и увесте, яко Аз есмь Господь. И прорекох, якоже заповеда ми Господь. И бысть глас внегда ми пророчествовати, и се, трус, и совокупляхуся кости, кость к кости, каяждо ко составу своему. И видех, и се, быша им жилы, и плоть растяше, и восхождаше, и протяжеся им кожа верху, духа же не бяше в них. И рече ко мне: прорцы о дусе, прорцы, сыне человечь, и рцы духови: сия глаголет Адонаи Господь: от четырех ветров прииди, душе, и вдуни на мертвыя сия, и да оживут. И прорекох, якоже повеле ми, и вниде в ня дух жизни, и ожиша и сташа на ногах своих, собор мног зело. И рече Господь ко мне глаголя: сыне человечь, сия кости весь дом Израилев есть, тии бо глаголют: сухи быша кости нашя, погибе надежда наша, убиени быхом. Того ради прорцы, сыне человечь, и рцы к ним: сия глаголет Адонаи Господь: се, Аз отверзу гробы вашя и изведу вас от гроб ваших, людие Мои, и введу вы в землю Израилеву: и увесте, яко Аз есмь Господь, внегда отверсти Ми гробы вашя, еже возвести Ми вас от гробов ваших, людие Мои: и дам дух Мой в вас, и живи будете, и поставлю вы на земли вашей, и увесте, яко Аз Господь: глаголах и сотворю, глаголет Адонаи Господь.

Стихиры на литии, гл.2, подобен: *Егда от древа*:

Яко овцы на заколение,/ Возведошася святии мученицы в Бутово/ Разлученныя с присными и братией/ И от безчеловечных на смерть осуждаемии/ Вкупе со иными страдальцы безчисленными/ Тогда же всеярыя на беззащитных вооружишася,/ Некасаему отнюд духу мученик,/ Воздыхающих о видимем с великим Силуаном мысленно:// Еда сие есть путь Христов.

Яко агнцы безгласныя прямо стригущих,/ Предсташа страдальцы лютым застрельщиком,/ Иже свирепством всесвирепых превозшли суть,/ Изрыгающе на отчаянных вопли неистовыя/ Разумеша же окаяннии яве немощь свою,/ Зряще страстотерпцев мужество, ведомых на смерть,/ Преистязанных, ураненных, духом же бодренных/ Токмо просящих у Бога грехов прощения// Исполняюще единый всем завет Христов.

Ни вопиют, ни противоглалолют,/ Ни отверзают уст святии мученицы,/ Предзряще скорое от земных уз разрешение/ Сего ради тщатся укрепити немощныя, малодушныя утешити/ Паки и жалости о конечне обезумевших/ Всенезлобивы сердца исполняются,/ Преисполнены без меры благодатию,/ Токмо во глубине неслышимо плачущии:// Еда сие есть путь Христов.

Во смирении христоподражательне/ Суд святых над миром взимается,/ Се бо удержанным от Бога копиям ангельским,/ Богопротивников поразити хотящим,/ До конца покаряются святии мученицы/ Непостижному о себе Промыслу,/ Паче же тщатся пострадати за Господа,/ Единый суд износя вселютости:// Еда сие есть путь Христов.

Кто небесный не воспоет сих ангелов земных,/ Кто земный не удивится небошественну тех подвигу,/ Кто же роды их безчисленны исповесть,/ Явльшихся мирови человеков истинных/ Небесною дышущих любовию,/ Яже вопиет сокрушающим сосуды ея:/ Не косните преломляя сие брение,/ Но делайте убо дело свое -// Нощь несветла, но ясен путь Христов

Слава, глас и подобен тойже:

Яко овцы на заколение ведомыя/ И яко агнцы безгласни прямо стригущих,/ Тако не отверзают уст своих/ Святии мученицы Бутовстии,/ Се бо во премирнем смирении/ Суд их миру отступническу взятся/ Кто же роды их безчисленны исповесть/ Сего ради взятся от земли/ Токмо небес достойный живот их/ Живожертвенно приношение Господу/ Агнца подобий Божественна -/ Во веки вселяющихся,// Идеже всяческая и во всех Христос

И ныне, глас 7:

Разверзающуся на Руси лихолетию,/ Плачем вдов и сирот преисполнену,/ Тьмами сирот, вдовиц горьким тысящам/ Неутешней земли приложилося,/ Убиенным страдальцем в Бутове/ В небе ж русском звезды неизчетныя/ Возсияша нам в просвещение/ Да любовию поем Вышней Троице:/ Свят, Свят, Свят еси, Боже праведне -// Богородицею помилуй нас.

На стиховне -
стихиры Пасце(аще Преполовение) или из малой вечерни (аще 26 иулия):

Слава, гл.2, подобен «Доме Евфрафов»:

Бутово врата небесныя/ Страшнодивновеликия/ Кровию праведничею священныя/ Отверзай божественныя входы верным// Дерзновением святых мучеников

Тропарь, глас 4:

Всуе шатается богоотступных соборище, На Христа возстает древней лютостию, Устрелянием убо тщится дерзостне Христоносных в Бутове мученик одолети, Но всеславное тех Серафимово воинство, Всеоружие восприим Креста, Утверждает веру ревностию, Упование страстотерпчеством, Водворяяся в Царстве всепобеждающия любве

Тропарь ин, глас 4:

Нивы церковныя класы безчисленнии/ Плод сторичный яве приносят/ Смертным страданием в Бутове за Христа/ Полагаются в основание веры/ Укрепляют надеждею небесных/ Добропобедныя свидетелие Истины и Любве/ Дерзновении о нас молитвенницы/ Се бо кровь мученическая// Воистину семя Церкве есть.

На утрени

На Бог Гос­по́дь: ( аще Преполовение): тро­па́рь пра́зд­ни­ка два́­ж­ды. Сла́­ва: свя­тым, и ны́­не: пра́зд­ни­ка. (Аще 26 иулия) : тро­па́рь свя­тым( дважды), Слава и ныне: Богородичен гласа.

По 1-й кафисме седален: Подвиг ваш – нам терпения образ, уничижения ваша – се, смирение нам, смерть же ваша – упование нам, о мученицы!

Слава и ныне: Вверяются Ти чадца наша, о Мати, се бо Сыну Твоему со пророком вопиют плачевным: сири быхом несть отца.

По 2-й кафисме седален: Умертвителю ада даже до смерти служаще, о мученицы, служителей пагубы никакоже устрашилися есте.

Слава и ныне: О Заступнице неусыпающая! Не оставила еси страдальцев за Христа в Бутове умученных и в земли оной успнувших, и нас, немощных, заступлением не остави, Мати.

 

По полиелее седален:

Огорчися ад древле, срет доле Христа, паче же поруган бысть силою Воскресшаго, ныне же посрамляются самоизмышленныя пагубы рачитилие силою духа мучеников - Истины свидетелей.

Слава и ныне: О Иисусе воскресшем проповедуют апостоли, преподобнии утешаются, мученицы дерзновение приемлют, паки же и паки молит о нас Того Богородица.

Прокимен, глас 4: Тебе ради, Господи/ умерщвляеми есмы весь день: Стих: Вменихомся/ якоже овцы заколения:

Евангелие от Матфеа, зачало 36

Стихира по Евангелии, гл.6:

Святым, иже суть на Руси святей, Новомучеником преславным, Удиви Господь хотение Свое, Еже Церковь Русскую возродити Дерзновенным сих ходатайством, Сего ради о уделех своих умоляющим Мучеником Бутовстим возопиим: Радуйтеся, новыя звезды тверди церковныя

Канон, глас 6,
егоже краегранесие: Бутово претихое плач еси нам и упование хвала и дерзновение

Песнь 1

Ирмос: Волною морскою скрывшаго древле гонителя мучителя под землею скрыша спасенных отроцы, но мы яко отроковицы Господеви поем, славно бо прославися.

Святии новомученицы Бутовстии, молите Бога о нас:

Боже и Отче, Слова Родителю, кое принесу слово, кое пение дерзну воспети святым, славно Ти в оных прославльшемуся.

Святии новомученицы Бутовстии, молите Бога о нас:

Ужасается небо и трепещет земля от судищ измышленных, прелютых биений, устреляний безчеловечных, яже быша вам горний восход от рвов преисподних, о мученицы

Святии новомученицы Бутовстии, молите Бога о нас:

Тщится область темная праздники Богородицы омрачити убиением сотен страдалец, возсиявает же светлоликим мучеником Свет и Истина и Жизнь наша Христос.

Святии новомученицы Бутовстии, молите Бога о нас:

О доблих страстотерпец воинства! О боговместимыя тех немощи! О духа Серафима-старца, мученик богоизбранна вождя, певца же свято-Серафимова, паки новаго врача благодатна!

Слава: Воистину предстоятелю своему уподобилися есте, о мученицы, яко Небесныя Митрополии Серафимовой граждане, темже песнь победную воспеваете Спасу всех, душ наших немощи исцеляюще присно.

И ныне: Отроковице Мариами рождшейся, Иоаким торжествует со Анною, мученицы же состраждут Предстоящей Кресту, Ейже и спрославляются.

Песнь 3

Ирмос: Тебе на водах Повесившаго всю землю неодержимо тварь видевши на лобнем висима, ужасом многим содрогашеся, несть свят, разве Тебе Господи, взывающи.

Святии новомученицы Бутовстии, молите Бога о нас:

Погребение Христово свершает тайне благообразный, и Бутовстии рвы, гробы мученик, тайноявляются антиминсом Голгофы Русския.

Святии новомученицы Бутовстии, молите Бога о нас:

Рыдание, жалость и горе - се медоносный свиток, насытивый утробы ваша в дусе пророчестем, страстотерпцы.

Святии новомученицы Бутовстии, молите Бога о нас:

Еже во утеснении жити Христос вам есть, еже люте умирати, паче мирствуя в Нем, - неценимое есть приобретение.

Святии новомученицы Бутовстии, молите Бога о нас:

Терпим, гонимии, укоряеми, благословляем, хулими, утешаемся, - се бо Тебе, в Девичестем чреве испекшася, во утробах носихом, Христе - Хлебе наш.

Слава: И нраву Владычню причастницы показастеся и души всесердечне предасте Добродателю всех, о святителие и мученицы добросердии и добронравнии словом и именем, житием и смертию.

И ныне: Христовым скиптром ограждаеми Тобою, о Державная, век скончаваем, - мученицы взываша, - несть бо якоже Ты во святых, Дево Чудная Мати!

Седален, гл.6: На Христа востают иже греха рабы, на рабов Христовых ополчаются, но уязвленныя паче Христовою любовию мученицы, верою разжженыя тех отражают стрелы и от Онаго дерзновение приемлют, еже о нас непрестанно молитися

Слава и ныне: Преполовению или сей:

На Тя, Богородице, упование возлагаем, в немже мученицы не погрешиша, но одолеша во Христе смертию смерть. крепкодушнии.

Песнь 4

Ирмос: На Кресте Твое Божественное истощание провидя Аввакум, ужасся вопияше: Ты сильных пресекл еси державу, Блаже, приобщаяся сущим во аде яко всесилен

Святии новомученицы Бутовстии, молите Бога о нас:

Огорчися ад, срет доле Христа, паче же поруган бысть силою Воскресшаго, посрамляются же богоборнии дерзновением мученик, ихже радость Христос всесилен.

Святии новомученицы Бутовстии, молите Бога о нас:

Егда раждает, скорбь имать жена, о веце сем горцем прорече Господь, се ныне вы радуетеся по достоянию подвига, мученицы, убо зде оставльшихся ваших чад не оставите.

Святии новомученицы Бутовстии, молите Бога о нас:

Посекается возраст всяк прегорькия нивы Бутова: от зеленых отрок класов до согбенных к земли старец. О немощи, о пребезумия человекоубийц! О лютости!

Святии новомученицы Бутовстии, молите Бога о нас:

Лишаеми сна, надеждею не погрешают святии, еже на волею Раба бывша, пострадавша и успнувша смертию о всех, сих же ныне с Собою возставивша.

Святии новомученицы Бутовстии, молите Бога о нас:

Апостольски не точию юзники вожделели о Господе быти, о крепкодушнии, паче же за имя Его и на смерть дерзнули есте.

Слава: Что Господеви воздадим за священный Залог, о Немже имамы искуситися в день судный? - взываху во Бутове священномученицы, - всесожжение не довлеет, но любовию приими, Христe, души и телеса.

И ныне: Елицы стену необоримую Тя стяжавшии мученицы се во веки живут, успнув во Бутовских рвах, в райских селех пробуждаются, непобедимии.

Песнь 5

Ирмос: Богоявления Твоего Христе еже к нам милостивно бывшаго, Исаия, Свет видев невечерний, из нощи утреневав взываше: воскреснут мертвии и востанут сущии во гробех, и вси земнороднии возрадуются.

Святии новомученицы Бутовстии, молите Бога о нас:

Се новотворится Русь, от падения возстает, выи сопротивным не прекланяющим мучеником, ныне же Богу зовущих о нас из глубины Бутовских рвов.

Святии новомученицы Бутовстии, молите Бога о нас:

И храмы Твоя, о Вышний Архитектоне, отъяшася поруганнии, и домы раб Твоих предани быша татем, - се нашествие, паче иноплеменнича.

Святии новомученицы Бутовстии, молите Бога о нас:

Не презри, Всемощне, немощных Тебе ради, немощи ради нас приобщивыйся, убо призри и виждь укоризну нашу.

Святии новомученицы Бутовстии, молите Бога о нас:

Апостолу язык подражающе, мученицы, осуждение смерти носяще в себе прежде суда безбожна, в Безсмертнем Судии мудре утвердилися есте надеянием.

Слава: Мучеников начальника и архидиакона духу приобщаются, паки и паки миром молятся о убивающих служителие священных, полагающе себе самех на олтарь небесный в Бутове.

И ныне: Исполняются милостию сердца мученик, под Твою неизчетную прибегших милость, сомолитвенники убо приими о рабех Твоих, Мати Милосердая.

Песнь 6

Ирмос: Ят бысть, но не удержан в персех китовых Иона, Твой бо образ нося страдавшаго и погребению давшагося, яко от чертога от зверя изыде. Приглашаше же кустодии хранящии суетная и ложная милость сию оставили есте.

Святии новомученицы Бутовстии, молите Бога о нас:

Ураняеми смиренномудрствуют, биени никакоже отчаяваются, убиваеми в краеугольный бут новыя жизни полагаются мученицы, о Христе возсозидая вся.

Святии новомученицы Бутовстии, молите Бога о нас:

По пророку, мерзость зрим запустения: на местех святых скверныя изрыгаются словесы, всескверныя же творятся деяния, - се, достояние наше обратися к чуждим.

Святии новомученицы Бутовстии, молите Бога о нас:

О храмех пылающих сердце жалостию горит, паче же о сожженней человеков совести, помяни убо Господи, что бысть нам.

Святии новомученицы Бутовстии, молите Бога о нас:

Вопиет Павел, яко жив есть Иисус умерый, се же мученик свидетельство в Бутове: Иисус Христос вчера и днесь, Тойже и во веки.

Слава: Авраамово недро греет вы, плача подвижницы, жертву хвалы всеконечную принесшии Отцу и Богу кающихся, преподобномученицы.

И ныне: На выя гонимии, томимии жаждею, благородием душ утверждаются мученицы, нетленныя жизни источник обретше Тя, Царице Боголюбивая

  Кондак, гл.6:

Русская Голгофа Бутово-село показася, яко древо спасения воздвигше Соловецкий крест, яко гроб святый явивше пребезмолвныя рвы – громогласныя свидетелие страстей и воскресения.

Икос:

Кто, мученицы Бутовстии, изречет ваша труды и болезни, яко и среде лютых го-нений храмы Божия возсозидаете, люди к житию во Христе привлекающе, тяжкия скорби и смерть претерпели есте за Христа. Сего ради ныне воспеваете Богу на небеси победный глас и за ны молитеся, яко неложнии свидетелие страстей и воскресения.

Песнь 7

Ирмос: Неизреченное чудо: в пещи избавивый преподобныя отроки из пламене - во гробе мертв бездыханен полагается - во спасение нас поющих: Избавителю Боже благословен еси.

Святии новомученицы Бутовстии, молите Бога о нас:

Иждиваеми огнем Божественным, пагубу наследствуют несветимую вси рачитилие тьмы, еяже избегше, светоносныя мученицы вопиют: Избавителю Боже благословен еси

Святии новомученицы Бутовстии, молите Бога о нас:

Ежеобразными иглами злодейств преуставлены, страхом Божественныя десницы спогибают мужие кровей, еяже сподобльшиися мученицы вопиют: Избавителю Боже благословен еси

Святии новомученицы Бутовстии, молите Бога о нас:

Христообразною кротостию мученик уязвлени, в преисподний низпадают тартар вси гнева сыны, не могуще вечнующую воспети песнь: Избавителю Боже благословен еси

Святии новомученицы Бутовстии, молите Бога о нас:

Велии ваша страдания, мученицы, велия се́рдца о присных туга, превелие же о Господе желание любомудрии, егоже достигше, вопиете присно: Избавителю Боже благословен еси.

Святии новомученицы Бутовстии, молите Бога о нас:

Андрея апостола благословение наследуя, благодати сыны и дщери явилися есте мужеством славнии, новую нам источаете благодать, еже с вами взывати: Избавителю Боже благословен еси

Слава: Лишений преисполнено житие, от безбожных лишенцами именуются исповедницы, но несть лишения на небеси - в смерти и по смерти вопиющим: Избавителю Боже благословен еси

И ныне: Андрей ужасается тайновидец, зря небесе и земли Царицу - слезящу о чадех Царьграда и Косова, Куликова села и Бутова и венцы тех победныя созерцает зовый: Боже Избавителю благословен еси.

Песнь 8

Ирмос: Ужаснися бояйся небо и да подвижатся основания земли: се бо в мертвецех вменяется в вышних Живый и во гроб мал странноприемлется,Егоже отроцы благословите, священницы воспойте, людие превозносите во вся веки.

Святии новомученицы Бутовстии, молите Бога о нас:

Истощитися невозможно дерзновению Христовых мученик, от Стефана перводиакона и до Бутова и даже до скончания времен взывающих: отроцы благословите, священницы воспойте, людие превозносите во вся веки.

Святии новомученицы Бутовстии, молите Бога о нас:

Дерзновением и надеждею соявляетеся святии соубиваемым вам страдальцем, научающе в смерти и во веки Содетелю всех взывати: отроцы благословите, священницы воспойте, людие превозносите во вся веки.

Святии новомученицы Бутовстии, молите Бога о нас:

Егда устреляются страстотерпцы, се - молчанием вопиют: «Ныне, Владыко, отпущаеши с миром рабы Твоя,» - Ангелы же на небесех сретаются.

Святии новомученицы Бутовстии, молите Бога о нас:

Разверзаются вам Божественная небеса, святии , преисподний на земли вкусившии мрак: со Христом бо в горняя путь ваш, страстоносцы.

Благословим: За Христа и Господа умирают в Бутове святыя жены, ихже подвигом мироносицким Церковь зиждется на земли, ихже матерними мольбами спасение с небеси приемлем.

И ныне: Непобедимая и непостижимая воздвизается на богопротивныя сила Креста, непрестанно мучеником вопиющим: отроцы благословите, священницы воспойте, людие превозносите Христа во веки вся

Песнь 9

Ирмос: Не рыдай Мене, Мати зрящи во гробе Егоже без семене зачала еси Сына: востану бо и прославлюся и вознесу со славою непрестанно яко Бог верою и любовию Тя величающия.

Святии новомученицы Бутовстии, молите Бога о нас:

О страданиих ваших кто не поболезнует земный, о блаженстве вашем кто не возликует небесный! Темже в памяти вашей ныне да радуется вся тварь.

Святии новомученицы Бутовстии, молите Бога о нас:

Во очию нашею самоизмышленныя пагубы рачитилие низлагаются, се чаяния исполняются плачевная страстотерпцев, се новотворится Святая Русь.

Святии новомученицы Бутовстии, молите Бога о нас:

Еже о нас смотрение исполняюще, к жизни о Христе зовете, мученицы, подвига примером вдохновляете верныя, приснопамятнии.

Святии новомученицы Бутовстии, молите Бога о нас:

Новотворятся храмы, идеже вы трудистеся, славнии, се души воздвизаются земнородных на ваше подражание, приснопамятнии.

Слава: Именами вашими чада нарицаем, блаженнии, память вашу любовию празднуем, немощное да не презрите словес, да и совершеннейшия похвалы воздадятся вам.

И ныне: Егда славнии новомученицы воздохнут о нас Богородице, - уповаем Тою спасение улучити и возопити Благословенней: Яже о всех благая Мати - слава Тебе!

Светилен:

Се в Бутове светосияют мученицы, се ко Христу стезя нам разширяется.
Слава и ныне: Преполовению или сей: Се, Раба Господня - се вещание Твое ко Архангелу, Чистая, се, Небесная дольним совокупляются - се и дольним нам о небесных надеяние.

На хвалитех – стихов 6: Преполовению – 2 и сия мучеником – 4, глас 3:

Хвалите Его на силах Его:

Мняще свободитися от совести-мучительницы,/ Всуе о свободе превозглашаете,/ Раби суще нижайших страстей,/ На беззащитныя вооружаетеся, мучителие,/ Лающе и терзающе, ихже недостоин мир,/ Мните сломити непреклонныя,/ Паче щенячую вашу немощь являете,/ Техже крестославную свободу// Неволию, буии, проповедуете./

Хвалите Его во гласе трубне:

Свободившеся от незримых уз миролюбия,/ Истину познаша мученицы,/ Яже есть Иисус-Господь,/ Сего ради в Нем победивше мир,/ Паче Им распялися миру,/ Злостраданием и смертию лютою/ Яже срете их в веси Бутовстей,/ Идеже от привременных мира и жесточайших/ Восприят возлюбленных желаемый Господь Иисус,// Подая с небес свобождение вечное/

Хвалите Его в тимпане и лице:

О прекрасных ликов ваших, мученицы,/ О печати на оных страданий ужасных,/ О святой тишины в скорбных сих очесех,/ О смирения неописуема/ О плодов смертнаго вашего сеяния:/ Се бо новый сад в земли Бутовстей прозябе:/ Братство сродников, знаемых и чтущих вас,/ От конец собирающихся к вашей памяти -// Се мучениколюбцев единение.

Хвалите Его в кимвалех доброгласных:

От востока собрани и запада/ Звани бысте Божественным Промыслом/ От всякаго возраста, языка и звания/ На свидетельство о Христе в яро Бутово/ Да в расстрельных рядах и во рвах земных,/ И в небесном раи объимаяся, -/ Миру, мучиму ненавистною рознию,/ Всепобедный любве образ явите,/ Да и церковныя разделения// Во очию нашею дивно уврачуете.

Слава, глас 1: Всемирную славу,/ от Руси являемую в Бутове/ высшаго еже на земли подвига, о мученицы,/ вознесосте Господу во время новое,/ се бо гром устреляния вашего/ ехом премирным отдается/ в сече великаго Косова,/ в урезании без числа тифлисцев верных,/ в катакомбах Рима и Солунском торге,/ во свидетельствах неба всех времен от всея земли,// на Голгофе Божественней.

  На литургии

Бла­же́н­ны мучеником на 8, глас 4: Стих: Бла­же́­ни ми́­ло­сти­вии,/ я́ко ти́и по­ми́­ло­ва­ни бу́­дут.

Рыдание, жалость и горе - се медоносный свиток, насытивый утробы ваша в дусе пророчестем, страстотерпцы.

Стих: Бла­же́­ни чи́с­тии се́рд­цем,/ я́ко ти́и Бо́­га у́з­рят.

Ураняеми смиренномудрствуют, биени никакоже отчаяваются, убиваеми в краеугольный бут новыя жизни полагаются мученицы, о Христе возсозидая вся. Стих: Бла­же́­ни ми­ро­тво́р­цы,/ я́ко ти́и сы́­но­ве Бо́­жии на­ре­ку́т­ся.

Погребение Христово свершает тайне благообразный, и Бутовстии рвы, гробы мученик, тайноявляются антиминсом Голгофы Русския.

Стих: Бла­же́­ни из­гна́­ни пра́в­ды ра́­ди,/ я́ко тех есть Ца́р­ст­во Не­бе́с­ное.

Разверзаются вам Божественная небеса, святии , преисподний на земли вкусившии мрак: со Христом бо в горняя путь ваш, страстоносцы.

Стих: Бла­же́­ни ес­те́, егда́ по­но́­сят вам, и из­же­ну́т,/ и ре­ку́т всяк зол гла­го́л на вы, лжу́­ще Ме­не́ ра́­ди.

Вопиет Павел, яко жив есть Иисус умерый, се же мученик свидетельство в Бутове: Иисус Христос вчера и днесь, Тойже и во веки.

Стих: Ра́­дуй­те­ся и ве­се­ли́­те­ся,/ я́ко мзда ва́­ша мно́­га на не­бе­се́х.

Се новотворится Русь, от падения возстает, выи сопротивным не прекланяющим мучеником, ныне же Богу зовущих о нас из глубины Бутовских рвов

Сла́­ва: Воистину предстоятелю своему уподобилися есте, о мученицы, яко Небесныя Митрополии Серафимовой граждане, темже песнь победную воспеваете Спасу всех, душ наших немощи исцеляюще присно.

И ны́­не: Егда славнии новомученицы воздохнут о нас Богородице, - уповаем Тою спасение улучити и возопити Благословенней: Яже о всех благая Мати - слава Тебе!

  Молитва Бутовским мученикам.

О подвижницы веры ревностнии! О страдальцы Голгофы русския, неодолимии в терпении! О претихие мученицы - о плач, о священная славо Бутова! Се лихолетию на Руси разверзающуся прегорчайшему, се, не ведущии милости на суды вас предают беззаконныя, се уста отверзаются неправеднии, лютую вам возглашающе казнь. Се подъястеся руце безчеловечнии, во еже устрелити вас, умертвити яко жизни о Христе свидетелей! Руце убо повергошася ваша, немотствуют уста, сердца пламеннии угасоша во рвах Бутовских. Но, о людие Божии, се воздвигл есть Господь души ваша, се извел вас от гроб ваших, се Дух Свой дал есть в вас. Се и мы познахом, яко жив есть Господь, и вы убо, Его ради успнувшия, славою возстаете вечною, радостию сияете некончаемою на небеси, яко и молитвами вашими православие утверждаете, разделения врачуете горькия, возсозидаете храмы, чада новыя во ограду церковную вводите. Се свидетельство истинное, яко велие дерзновение о Господе обретосте. Собирающеся убо в вашей памяти, смиренно молим вас, еже неврежденно соблюсти нам единение сие духа в союзе мира, да по образу вашему новым быти народом Божиим, по слову апостольску священством царственным, во еже аще скитаемся или страждем, благоденствуем или утешаемся, умираем убо или живем - со Христом и с вами единятися во веки веков. Аминь.

Просмотров: 3791