Служба священноисповеднику Василию, епископу Кинешемскому

святитель Василий Кинешемский

(память 31 июля / 13 августа).

 

Стихиры на «Господи, воззвах» – 8, глас 2, подобен «Егда от древа»:

Из глубины воззвах к Тебе, Господи:

Рождество твое, святе Василие,
Собором Крестителевым знаменуется,
Се же промыслом указуется Божиим,
Яко рачителя просвещения являющее тя нам,
Яко и Маркову благовестию,
Егоже светлоуяснил еси,
От Предтечевы зачинатися проповеди,
Паки Спасовей утверждатися:
Покайтеся и веруйте во Евангелие.

Да будут уши Твои:

Чиста юность твоя, святе Василие,
Образ являет степенна усердия,
От талантов неослабеваема:
Тако усвояемым дарам ти Божиим,
Яко всюду во учении первенствуя,
К вышнему познанию устремляешися,
Еже во Христе Иисусе:
Поминая о истиннем души восхождении -
Покаянием и верою во Евангелие.

Аще беззакония назриши:

Многая познав от учения,
Отдавая учительством, паче сия умножал еси,
Яко юных воспитанию ти служити изрядно,
Паки, мудре, смиряешися,
Среде тьмы, нашедшия на Святую Русь,
По стопам пастыря добра и отца
Направляеши стезю жизненную,
Слову Божию сообразную:
Покайтеся и веруйте во Евангелие.

Имене ради Твоего:

Не ища земныя хвалы высотою служения,
Еже Божиим званием возложено ти скоро бысть,
О посте ревнуя, прилежа в молитве,
О смятенной пекийся всеусердием пастве,
Собирая ю состраданием, воспитав словом Спасовым,
Волки мысленныя от тоя изгоняя,
Не смущен николиже оных дерзостию,
На первейшем утвержден от Книги Жизненныя:
Покайтеся и веруйте во Евангелие.

От стражи утренния:

Не преломят тя, Василие, богоборных гонения,
Не лишат ничесоже нищетою вседовольнаго,
Но среде утеснений лютых
От богатств христолюбивыя души
Созидаеши, яко некий Божественный храм,
Книгу жизни твоея и славы -
Беседы о благовестии Маркове -
Яко во веки пити нам от струи неизсякаемы:
Покайтеся и веруйте во Евангелие.

Яко у Господа милость:

Заточения ти, Василие, производят терпение,
Преселения – духа свободное,
Разлучения с паствой моления являют силу,
Яко сердцем присных не отдаляешися,
Вражиих лукавство соблазн – смиренномудрие,
Паче правды тя ревнителя показуют,
Представляюща Божие над человеческим присно,
Яко дыша воздухом, сим живеши:
Покайтеся и веруйте во Евангелие

Хвалите Господа вси языцы:

Невозможно есть твоя скорби изчислити,
Неудобно сих глубину исследити,
От темниц до изгнания в веси дальния,
От прелюта глада до горчайших работ,
Отягченна леты, Василие, и немощию,
В нейже сила Божия совершается,
В нейже дух от земли удаляется упованием,
Единое содержа сердцу правило:
Покайтеся и веруйте во Евангелие.

Яко утвердися милость Его на нас:

Искушен, о Василие, по всяческим,
Плотию совершенне умертвился еси,
Ни единаго соуза с миром тленным оставль,
Всею жизнию диавола поборая,
Богу же вся ти силы отдая,
Се – исходу, святе, приближаешися,
Се – уготовляешися молитвою:
Боже Милостиве, прими, дух мой:
Се бо каюся и живу Евангелием.

Слава, глас 3:

Обнищавый Христа ради на земли, о Василие,
Не остави нищеты нашея о дусе,
Чистоту возлюбивый Бога зрящую,
На пути спасительны настави целомудрием нас,
Ты - ходатай и упование нам о Господе:
Поверяем убо, отче, себе предстательству твоему.

И ныне: Богородичен 1-й гласа:

Како не дивимся…

Вход, прокимен дне и чтения 3:

Притчей чтение.

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку, и блажен человек, иже пути моя сохранит. Исходи бо мои – исходи живота, и уготовляется хотение от Господа. Сего ради молю вас и предлагаю мой глас сыновом человеческим: яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим и проста обретающим разум. Научу бо вас истине, да будет о Господе надежда ваша, и исполнитеся Духа.

Премудрости Соломони чтение.

Уста праведнаго каплют премудрость: устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуся мужу праведну, не погибнет надежда. Сын бо праведен раждается в живот, и во благих своих плод правды обымет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобныя сердца, приятни же ему вси непорочнии в пути. Мудрость Господня просвещает лице разумнаго. Постигает бо желающия ю, прежде даже разумети ю, и удобь узрится от любящих ю. Утреневавый к ней, не утрудится, и бдяй ея ради, вскоре без печали будет. Яко достойных ея сама обходит ищущи, и во стезях ея является им благоприемне. Мудрости никогдаже одолеет злоба. Сих ради и рачитель бых доброты ея, и возлюбих ю, и поисках от юности моея. И взысках невесту привести себе, яко всех Владыка возлюби ю. Таибница бо есть Божия хитрости, и обретательница дел Его. Труды ея суть добродетели: целомудрию же и разуму та учит, правде и мужеству, ихже потребнее ничтоже есть в житии человеком. Аще же и многаго искусства желает кто, весть древняя, и быти хотящая разсмотрит: свесть извития словес, и разрешения гаданий, знамения и чудеса проразумеет, и сбытия времен и лет; и всем советник есть благ, яко безсмертие есть в ней, и благославие во общении словес ея. Сего ради беседовах ко Господу, и помолихся Ему, и рех от всего сердца моего: Боже отцев и Господи милости, сотворивый вся словом Твоим, и мудростию Твоею устроивый человека, да владеет бывшими от Тебе тварьми, и да управляет мир в преподобии и правде. Даждь ми Твоих Престолов приседящую премудрость, и не отлучи мене от отрок Твоих, яко аз раб Твой, и сын рабыни Твоея. Посли ю с Небес от святаго жилища Твоего, и от престола славы Твоея, да сущи со мною научит мя, что благоугодно есть пред Тобою, и наставит мя в разум, и сохранит мя в славе своей. Помышления бо смертных вся боязлива, и погрешительна умышления их.

Премудрости Соломони чтение.

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их: и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему. Яко благодать и милость в преподобных Его, и посещение во избранных Его.

Стихиры на литии, глас 8:

Мир во зле весь лежит –/ сего ради праведники не терпит,/ яко стадиями изгоняя тех,/ в вожделенно им Царство Небесное,/ сию же благую часть от епископства, Василие, восприял еси,/ вопия мысленно с Велемирным Николаем:// никакоже кляну - благословляю сия./

Страстем Господним поклонение/ многажды молитвенно совершая, о Василие,/ Христову изгнанию приобщаешися,/ от храмов новоневерными отлучен с честною ти паствою,/ обаче молитвою стогны града яко святилища явил еси// поднебесным литургисанием благословляя сия./

До Зырянских лесов досязаяща,/ Кострома несильна удержати Василия,/ егоже темница ждет во граде Иоаннове,/ до Урала по заточении паки отсылаема,/ еще же при Рыбинске-граде/ летами пятию на работы горькия осуждена,// ничесоже от тех клянущему – благословляющу сия./

Отягчена леты, утруждена болезньми,/ ко исходу тя Котово-село уготовляет тихостию,/ Ярыя же славы града темница/ с Лубянкою и Бутыркою лютыми,/ яко вся претерпевшу евангельски до конца,// упокоение мирно, Василие, обручают ти./

Слава, глас тойже:

О страдальче предобре, о Василие святоизгнанниче,/ от земли Сибирския, тя упокоившия,/ прииди, научи люди новыя, святителю,// подражая терпением, благославити тя.

И ныне, глас тойже:

Вифлеему, затворшему двери Ти, Дево, не стужила еси,/ во Египет изгнана, тому вознесла еси благословение,// по успении паки мира не оставляши, Пресовершенная.

Стихиры на стиховне, глас 2, подобен «Доме Евфрафов»:

Земле Кинешемская, / возликуй Исаии гласом,/
се бо свет прииде твой,/
слава возсия тебе Господня днесь//
именем Василия святителя.

Служити Ему/ преподобием и правдою:

Храме Вознесения, /
новым величайся Златоустом,/
многочастне житием прешедшим/
древняго многострадально поприще,//
исповедником Василием святителем.

Дати разум спасения /людем Его:

Соборе новомученик со исповедники,/
злато Церкве Русския,/
ясно возблистай таланты днесь/
подвигом изрядным многоусугублены//
чуднаго Василия святителя.

Слава:

Христозваннии людие,/
бодрствуим в молитвах,/
се бо ввери ны Господь/
неусыпающу ходатаю,//
исповеднику Василию святителю.

И ныне:  О чудесе новаго…

Тропарь, глас 1

Во всю землю Русскую изыде вещание твое,/ яко истаго Евангелия рачителя,/ яко пастыря, слово житием утвердившаго,// священноисповедниче о Василие, чудне отче наш./

НА УТРЕНИ:

Седален по 1-й кафизме:

Школу истинную прощед житием и учением, о воспитании ревнуеши младости, благочестием утверждая верныя земному царю, о премудре учителю.

Слава и ныне: Долготерпеливыми воспитана Иоакимом и Анною, паки от ангельския беседы возрастши, утверди ны благочестием во смирении истиннем, Богородице.

Седален по 2-й кафизме:

В дом отечь по учении возвращься, о просвещении ревнуеши народа Божия, еже от всяка слова, от Христовых пречистых устен исходящаго.

Слава и ныне: Дом небесный сретает Тя, яко скинию истинну, Богомати, егоже достигши, не остави убо сиры нас.

Величание: святительское

Седален по полиелее:

Просветителю и наставниче, подвига рачителю, благочестия правило, всем ходатай явился еси Василие: моли Спаса о нас.

Слава и ныне:

Истину, Путь и Жизнь, Свет явльши миру, Богородице Пресвятая, спасай нас.

Прокимен, глас 4: Святым, иже суть на земли Его, удиви Господь вся хотения Своя в них

Стих: Предзрех Господа предо мною выну, яко одесную мене есть, да не подвижуся.

Евангелие от Матфеа 43 зачало,

Стихира по Евангелии, глас 6:

Святым иже суть на Руси святей,/ новоисповедником и мучеником/ удиви Господь хотение Свое,/ еже Церковь Русскую возродити/ дерзновенным сих ходатайством,/ сего ради о земли своей умоляющу,/ священнодивному Василию возопиим:// радуйся Кинешемский светочу!

Канон, глас 4

КРАЕГРАНЕСИЕ: Евангелия Христова пою толковника вдохновенна Василия святоисповедника

Песнь 1

Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Священноисповедниче отче наш Василие, моли Бога о нас:

Евангельских взыскуя глубин, паству в слове Божии наказуеши, о Василие, от апостол и святых отец научен, паче же от благодати Духа.

Священноисповедниче отче наш Василие, моли Бога о нас:

Верою во Евангелие, исполнением того опытне - утверждатися научаеши, о Василие, яко благая суть миру весть, во тьму погруженному.

Священноисповедниче отче наш Василие, моли Бога о нас:

Аллилуия, слава Боже, Тебе, - восклицаеши духом, Василие, святонедосязаемым уязвлен от Евангелия образом Всецаря Господа.

Священноисповедниче отче наш Василие, моли Бога о нас:

Непостижна премудрость, любы неисповедима, духа сила необоримая, - истое сие Христово - возглашаеши, Василие - верным даруются на созидание душ о Господе.

Священноисповедниче отче наш Василие, моли Бога о нас:

Глас в пустыни вопиющаго – ясно слышиши сие, Василие, и возглашаеши -исполняет Слово Отчее Божественное, еже: покайтеся и веруйте во Евангелие.

Священноисповедниче отче наш Василие, моли Бога о нас:

Единаго на потребу взыскати, в слове утверждатися Божии, наставляеши, отче Василие, да себе отрещися возможем, да наследим Царство.

Слава:

Любочестно есть скорбей терпение, свидетельствуеши от Евангелия, Василие, - тем бо смирение истое восприемлется, во образ Божественна.

И ныне:

Иисусу Пребожественну во всесвятии руце уготовляеши предати душу, о Дево Пречистая, да соцарствуеши Тому, яко Сыну и Господу.

Песнь 3

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Священноисповедниче отче наш Василие, моли Бога о нас:

Яко наследник великаго во учителех небеснаго ти покровителя, являеши ся, Василие, созидая в душе истинный храм, лес на сие обрядов пользуя, да обрящеши мзду верна и мудра благодати строителя.

Священноисповедниче отче наш Василие, моли Бога о нас:

Христолюбней пастве твоей проповедуеши, отче, неленостне, яко Зиждителем вдохновенна душа на лучшие устроена думы, еяже ради омовения торжества Той уставил есть церковныя.

Священноисповедниче отче наш Василие, моли Бога о нас:

Ради литургии Божественны причащения и праздники и все житие наше есть, - возглашаеши, отче, - да не устрашимся тоя ради и претерпети до конца вся.

Священноисповедниче отче наш Василие, моли Бога о нас:

И звание восприим ко престолу апостольску, и трудам их причастник являеши ся, Василие, не возносяся отнюд, но яко должник усердствуя.

Священноисповедниче отче наш Василие, моли Бога о нас:

Се учиши ны от Евангелия, отче, яко связани есмы любви узами вси, яко чада церковная, се же долг, се ответ нам пред Господем.

Священноисповедниче отче наш Василие, моли Бога о нас:

Токмо да не победимся самостию, упреждаеши ны, о Василие, да не отлучимся благодати от небратолюбия, и, якоже Каин, ничтоже пользуемся.

Слава:

О Спасе тонкое являя сострадание души, зриши убо, отче, Того от сродник уничижаема, о Самосущней Премудрости, яко неистова есть, шепотствующих несмысленне.

И ныне:

Волю Небесна Отца пришед исполнити, Спасе, утешаеши верныя, вследствующия Евангелию именуя истинно братиею и сестрами Ти, паки и Материю.

Седален:

Кинешмы истая сый доброта, Василие, яко некий скимен оставаляеши чадом премудрое Марково толкование, имже питаеми, паки к сему возвращаемся, да от святости твоея насытимся.

Слава и ныне: Помоще миру сущи и стена тверда, Пречистая, заступи ны от находящих бед.

Песнь 4

Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.

Священноисповедниче отче наш Василие, моли Бога о нас:

Алчбу духовную обручает самолюбия камень, не дая утвердитися класу от семени слова Божия, паки поглощает сие терние суеты, аще не возревнуим трудом о земли наших душ, просвещаеми тобою, Василие.

Священноисповедниче отче наш Василие, моли Бога о нас:

Пощады не весть правда Божия, низлагая рубы самоизмышления человеча, возсиявая нам идеалом евангельским, проповедуемым тобою, Василие.

Священноисповедниче отче наш Василие, моли Бога о нас:

Ослабы не весть христолюбна душа о подвизе, яко труд непрестанен ясноявляет истое духовное житие, егоже и показал еси, симже образом от сна лености возстаем, обличаеми тобою, Василие.

Священноисповедниче отче наш Василие, моли Бога о нас:

Юже избрал еси правду Божию, еяже молитвою держался еси, сию пред соблазны вражиими предпоставил еси изряднее, противу силы темныя ко Господу взывая о себе и чадех духовных, Василие.

Священноисповедниче отче наш Василие, моли Бога о нас:

Токмо верным о Господе крестоношением, паки же себе вниманием и молением непрестанным противу силы устояти возможем темныя, - се, завет нам отечь, чадом духовным твоим, Василие.

Священноисповедниче отче наш Василие, моли Бога о нас:

Откровенно свидетельство, исповедание силы Божия, избавляющия зла, всемилующия, николиже оставляющия – се же нам укрепление от словес твоих в уповании духовнем, Василие.

Слава:

Лицезрение верности, паки и благородныя чести исповедания первомученик восхищает ти, отче, дух, уязвляет же сею памятию и чада духовныя твоя, Василие.

И ныне:

К небесным ныне тщишися, Дево, к наднебесным духом воспаряеши, Пречистая, идеже Сын Превечнаго Отца и Твой по человечеству, о Мариам.

Песнь 5

Ирмос: От све́та пресеки́й перворо́дный све́т, я́ко во све́те дела́ пою́т Тя́, Христе́, Соде́теля, во све́те Твое́м пути́ на́ша напра́ви.

Священноисповедниче отче наш Василие, моли Бога о нас:

О исповедании Афанасиеве, о Дамаскина свидетельстве ликует сия лизезряще ти дух, паки и ревнует, Василие, тем подражанием.

Священноисповедниче отче наш Василие, моли Бога о нас:

Всех времен славолепие исповедание истинно является, паче же мученичество есть, - яснозриши сия, о Василие, - увлекая с собою и верныя ти к подражанию.

Священноисповедниче отче наш Василие, моли Бога о нас:

Несть христианства без креста, - свидетельствуеши сия, о Василие: аще Церковь гонима есть – уничижение убо и нам предлежит, да терпение стяжим, образ ведяще твой к подражанию.

Священноисповедниче отче наш Василие, моли Бога о нас:

Исповедуеши, Василие, еже есть христианина жизнь: терпит Христос, да терпим и мы, образ ведяще Того к подражанию.

Священноисповедниче отче наш Василие, моли Бога о нас:

Коль великая нужда в подвизе непрестаннем есть, аще и ко исповеданию призвати восхощет Господь, - опытне познаеши, отче, сия - в сем же настави и укрепи ны.

Священноисповедниче отче наш Василие, моли Бога о нас:

Адамантову крепость о Дусе стяжал еси, о Василие, среде люта гонения, оставль совершенный образ, яко да сим укрепиши ны.

Слава:

Ведени будете, - рече Господь, - но не себе поведете сами, - от Евангелия проповедуеши, отче, да не гордоумием лжевосхитим самовольне венец истаго исповедания.

И ныне:

Дева первее ко Вифлеему тщится, да Спаса родит миру плотию, ныне же ко Гефсимании течет, яко да Тому возвратит и тело, и душу пречистыя.

Песнь 6

Ирмос: Внегда́ скорбе́ти ми́, возопи́х ко Го́споду, и услы́ша мя́ Бо́г спасе́ния моего́.

Священноисповедниче отче наш Василие, моли Бога о нас:

Осуществуяй тайны церковныя и молитвы, Дух животворяй и приснодействуяй, не являет Ся нерадивей убо души – се, Василие, леность нашу упреждаеши.

Священноисповедниче отче наш Василие, моли Бога о нас:

Христа Бога познавше, суд лютейший предуготовляем себе, потакая греховным страстем, яко тех широте и глубине и силе возрастати яве, - малодушие наше, Василие, обличаеши.

Священноисповедниче отче наш Василие, моли Бога о нас:

Нерадиво медление гибель вечную навлекает во брани духовней, яко и во внешней телесную убо смерть, - сим же образом нас, о Василие, на молитву и труды спасительны воздвизаеши.

Священноисповедниче отче наш Василие, моли Бога о нас:

Одоление врага токмо во брани совершается, да уготовимся убо к сей желанием, о Господе упование полагая, твоими, Василие, утверждаеми словесы и молитвами.

Священноисповедниче отче наш Василие, моли Бога о нас:

Всякое о Господе дело молитвою совершается, паче же Того благословением: многочастне от источника сего утолял еси жажду духовную, Василие, да не лишимся и мы дерзновения, Промыслу вся поверяя Божию.

Священноисповедниче отче наш Василие, моли Бога о нас:

Елика прелюбезна вся творит победительна сила Христова, обаче благоволение Спаса есть, да и мы, якоже и апостолиТого, вкупе же и с тобою, Василие, части в сем да сподобимся.

Слава:

Непреложни суть законы Евангельския, по нимже Небесное устрояется Царство силою Бога Слова, в Немже, яко твари Зиждители, вся живут и движутся – дерзновением провозглашаеши сия, о Василие тайнозрителю.

И ныне:

Не премолчи, камо отлетаеши, Горлице, прегорних како досязаеши, Ластовице? До гнезда возношуся Сына Моего – Превечна Орла Небеснаго.

Кондак, глас 6:

Кинешемскую звезду,/ поборника веры чистыя,/ просвещения народа ревнителя,/ Евангелия толковника изрядна,/ верна Господеви исповедника,/ царско воистину священие,// Василия пречудна восхвалим вси./

Икос:

Где слово твое, о Евангелии согласное, не проповедуется, Василие, / где не дивятся подвигом твоим,/ где кончина твоя блаженна не прославляется,/ - се бо от восток Руси до запад слышимь есть верных глас:// славу Кинешемскую, святителя чудна да восхвалим вси.

Песнь 7

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Священноисповедниче отче наш Василие, моли Бога о нас:

Аллилуиа, осанна – хвалу воспеша дети Отцу и Сыну Его, Духом Святым величие Христа возславивше, Емуже словом поклонение воздал еси на земли, Василие, Егоже вечне на небесех поеши: Боже Царю – благословен еси.

Священноисповедниче отче наш Василие, моли Бога о нас:

Вечнующую обручает гибель непостоянное души усердие ко Христу – во трезвении утверждаеши верных, Василие, духом лицезря звавших «осанна» яростию вопиющих о распятии Спаса всех.

Священноисповедниче отче наш Василие, моли Бога о нас:

Авраама вере, Исааковей жертвенности, благочестию Иаковлю учит храм, да изгоним зде неподобныя помыслы, якоже Спас торгующих, наставленьми твоими утверждаеми и молитвами, отче Василие.

Священноисповедниче отче наш Василие, моли Бога о нас:

Спасу первее послушанием вдал еси себе, яко истый монах, да любовию мученика единишися с Ним – сему царску пути наставляеши словом убо и житием, о Василие.

Священноисповедниче отче наш Василие, моли Бога о нас:

И тело на подвиги учредив, и душу во святыне утверждаеши, Василие, дея бо учиши о кодранте вдовы евангельския, яже с лептою жития тленнаго верже в Божию сокровищницу сердце свое.

Священноисповедниче отче наш Василие, моли Бога о нас:

Лукавнообразен явлься, неблагодарностию отягчен, окамененное стяжевает нечувствие предатель Христов, - обличаеши Иудовы несытость души, Василие, да сея избегнем, тобою наставляеми.

Слава:

Истая храма доброта ревностен есть ко святыне богомольцев дух: о Василие, сие ощутив, в томже чад о Господе благоговеинством утверждаеши.

И ныне:

Яко предолгая чреда добронравна духа побед является ти от Евангелия святость, юже стяжав, словом, отче, сияеши нам, житием, дерзновением пред Богоматерию.

Песнь 8

Ирмос: В Вавило́не о́троцы, боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени, ороша́еми, поя́ху: благослови́те, вся́ дела́ Госпо́дня, Го́спода.

Священноисповедниче отче наш Василие, моли Бога о нас:

Спаса образом живым влече тя ко страданию Чаша Господня, да любовию, отче святый, положиши душу за искренния, сей же образ в слове оставль нам.

Священноисповедниче отче наш Василие, моли Бога о нас:

Вечерю присно вкушая совершенных таин, велию страданию, отче святый, приобщаешися о Господе, любовию Того во блаженство ти претворяему.

Священноисповедниче отче наш Василие, моли Бога о нас:

Яко тягота мучительна беззакония наша вся возлагаются на божественно чистую душу Спасову, сия свидетельствуеши, отче, ужасая благоговейныя.

Священноисповедниче отче наш Василие, моли Бога о нас:

Ты, возлюбленне Спасе мой, сиянием неповинныя чистоты предстал еси судиям, и мене – сице, отче, взывал еси, - утверди на сие предстояние о благодатнем в Тебе достоинстве.

Священноисповедниче отче наш Василие, моли Бога о нас:

О Незлобиве, – взываеши, святе, - о, Божественный Агнче! Не отверзаяй пречистых устен, молчанием препобеждаяй вся, и мене на сопротивныя вооружи тишиною духа.

Священноисповедниче отче наш Василие, моли Бога о нас:

Искуплены есте ценою – се, апостол зовет. Се мучительство крестное, непостижная смерть Живота. Се подобная страшная ми предстоят, помышлял еси, отче, - помяни мя тогда убо, Спасе мой.

Благословим:

Се Божественный Крест светлоозаряет вся, имже живем, движемся и есмы, словом твоим, страдальче Василие, питаеми, орошаеми твоими молитвами.

И ныне:

Превозмогает вся правда Божия. Се тишайшая сила, неодолимая, юже да восприимем сердцем, Богородицы молитвами.

Песнь 9

Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Священноисповедниче отче наш Василие, моли Бога о нас:

Образ подписав Ионы-пророка, обетование исполняет Спас воскресением, паки же тя, Василие-отче, воскрешает с Собою, вся претерпевшу до конца.

Священноисповедниче отче наш Василие, моли Бога о нас:

Воскресый Христос - Бог наш истинен, камень краеуголен веры нашея – исповеданием сим утверди ны, о Василие святоисповедниче.

Священноисповедниче отче наш Василие, моли Бога о нас:

Еже Тя знати, воскресша Христа – се, нетщетная вера наша, Спасе, се Василий пресладко учит, яко несть христианства вне сего исповедания.

Священноисповедниче отче наш Василие, моли Бога о нас:

Да превозмогут зло благостыня и правда, - се являет сия воскресый Христос - се во веки поеши Ему песнь победну, Василие.

Священноисповедниче отче наш Василие, моли Бога о нас:

Ныне Спаса востанием торжествует над смертию жизнь, - о сем возвещал еси, Василие, сия убо во веки лицезриши.

Священноисповедниче отче наш Василие, моли Бога о нас:

Иисуса востанием Христа и Господа новая убо даруется нам жизнь, исполнь благодатныя силы, да тоя приобщимся, словом твоим и образом, Василие, вдохновляеми чудными.

Слава:

К наднебесным возшед, предстоит Отцу за ны воскресый Христос, да Ему возследуем от земли по стопам святых.

И ныне:

Аллилуиа поем, слава Боже, Тебе! Небеснаго Царства отверзаются убо и нам врата восстанием Спасовым, Богородицы предстательством, новомученик молитвами.

Светилен:

Просветися земля Кинешемская словом и подвигом твоим, не остави убо сию, святе Василие, заступлением отчим.

Слава и ныне: Небо и земля просветися, Дево, Рождеством Твоим, не лиши убо нас Твоего заступления, Мати.

На хвалитех стихиры 4, глас 5, подобен «Радуйся»:

Хвалите Его на силах Его:

Радуйся, Василие, пресиятельне,/
Тезоименным ти светочем соблистаяй:/
Декаполиту возследуяй исповеданием,/
Руси крестителю ревностию о просвещении,/
Новопреподобнаго восприемый тайнозрение,/
Нищету возлюбивый блаженна Московска,/
Пастырю Рязанску подобяся многочастным изгнанием,/
Острожску же святителю терпением утеснений всяческих,//
Великому ти покровителю - преизобилием даров./

Хвалите Его во гласе трубне:

Радуйся, церковных витий доброта,/
Радуйся, толковник божественных украшение,/
Древним и новым яснозрительне уподобивыйся:/
Афанасию и Кириллу постижением евангельских таин,/
Яко и тем согласну священномученику Григорию,/
Глубиною видения Филарету всемудру,/
Вышенску затворнику к путям спасения обращению,/
Феофилакту же широтою познания,//
Златоуста наследуя преизобилие даров./

Хвалите Его в тимпане и лице:

Радуйся, Василие, пречудне,/
Нищеты смиренны духа преисполненне,/
От неяже плач восприим со кротостию,/
Алчбу правды милостию насыщая,/
Богозрящей чистотою миротворствуя,/
О клеветах и изгнаниих агнче пренезлобиве,/
Радуйся же паки, пастырю наш, и веселися,/
Лествицею блаженств возшедый в горняя,//
Идеже Троицы наслаждаешися преизобилием даров./

Хвалите Его в кимвалех доброгласных:

Радуйся, новым мучеником и исповедником сопричастниче,/
Кроткоименну Никодиму – от обща учения,/
Соузы изгнания Кириллу всецерковному светочу,/
Александру же Семипалатинску сослужением,/
Преискренним согласием Афанасию гимнотворцу,/
Добру ангелу Ярославския церкве – единодушием,/
Предстоятелю отец даниловских – благопослушанием,/
Благословением же отеческим Ираиде тишайшей,//
Максиму блаженну ревнованием больших даров./

Слава, глас 6:

Сострадательныя трудники/ Александра со Ираидою/ с собою к подвигу привлекл еси,/ и нас ко спасению тесным стезям,/ ясным образом твоим, о Василие,// паки словом и молитвами привлецы./

И ныне, глас тойже:

Богородице, Ты еси лоза истинная,/ возрастившая нам Плод живота,/ Тебе молимся: молися, Владычице,/ с новомученики и исповедники,// помиловатися душам нашим./

Молитва.

О предобре пастырю и славне исповедниче Христов Василие!

Вемы, яко ты в житии заступал еси обидимых, милосердовал еси о страждущих, всем требующим помощи обреташеся место в пространнем сердце твоем. Паче же чистою молитвою стяжал еси Духа Божия, Иже освятил и умножил есть всякую добродетель твою. Сего ради мы недостойнии надежду несумненную возложихом на твое заступление, милосердие и любовь. Се бо, грехом нашим умножившимся, скорбьми якоже тучами обложихомся, и несть заступающаго или помогающаго, яко и благодати Божией лишаеми есмы душевныя ради нечистоты. Услыши, отче, призывающих тя, не презри к тебе вопиющих, заступи прибегающих под твой молитвенный кров. И якоже евангельское уяснив слово, сие чудными проповедал еси образы, тако и ныне светом теплых молитв твоих разсей мрак греховный страстей наших и возгрей спасительное сеяние Христово на Руси Святей, да умножится плод благовестия церковнаго.

Умоли Господа, святе Василие, да и мы, избежавше козней диавольских, во смирении духа мужественне тесный евангельский путь жития прешедше, мирныя христианския кончины сподобимся и тако достигнем блаженныя вечности на вожделеннем пире Царствия Божия, идеже вкупе с тобою и собратиями твоими, славными новомученики и исповедники, во веки воспоем Бога, во Святей Троице славимаго Отца и Сына и Святаго Духа. Аминь

 

Просмотров: 2171