Служба общая малому собору Бутовских мучеников

На Велицей Вечерни

На «Господи воззвах» стихиры самогласны

Гл.2 (Киевский распев)

Людие злочестивии и беззаконнии/ вскую поучаются тщетным:/ вскую неповинных истязуют яростию,/ вскую же онех сна и пищи лишают,/ паки же раны биеньми наносят,/ вскую же тысящми осуждают на смерть:/ но приемлют сия страстотерпцы смирением,/ в памяти о распятом Иисусе-Господе/ сего ради язвы Его носяще в телеси,/ устреляются лютее в веси Бутовстей,/ воспевающе духом вечнующую песнь:// слава, Господи, Кресту Твоему и воскресению Твоему.

Наследницы Варравы-убийцы,/ восхитивше область еже беззаконновати,/ яко ковы указы куют насмертныя/ неповинным, преистязанным, преотчаянным,/ избирают же веси убийственныя,/ в нихже Бутово горце первенствует/ тьмами жертв, пожираемых лютостию,/ но приемлют смерть предостойне мученицы,/ нивочтоже вменив козни вражия,/ воспевающе победную песнь Агнцу Божию:// слава, Господи, Кресту Твоему и воскресению Твоему.

Гл.7

Ужас бе видети/ страстотерпцев болезнь изведавших/ не имущих доброты видения/ в телесех, преисполненных ранами,/ очесем слезоточным о сродницех,/ ушесам от хулений незамкнутым,/ гортанем иссохшим жаждею,/ паче же дышущим верою сердцам,/ яко сице, в безмерней немощи// совершается сила Божия.

Глас 3

Исполняются чад и внуков моления/ обретается место страдания вашего, мученицы,/ место общаго упокоения/ во святейшем месте Святыя Руси./ Се завет от Господа, вами исполненный,/ се и нам наказ от священнаго Бутова:/ буди верен до смерти// и обрящеши венец живота.

Гл.2 (Киевский распев)

Что зримое видение?/ Кое настоящее упокоение?/ В рове Бутовстем субботствуют мученицы/ новую являюще нам жизнь/ духа силою, победной над смертию,/ дерзновением воздыхая и о нас Христу:/ Воскреси в оных ревность любве Твоея,/ яко Ты царствуеши во веки,// неизмерную имеяй велию милость.

Слава, глас 6: Сей день воистину страшный и славный вкупе/ Се свершаемым устреляниям в Бутове/ Се являему пребезумию человекоубийц/ Преподобие Господу свидетельствуется/ Верных сынов и дщерей человеческих/ Смертию проповедающих жизнь/ Се, возглашение в Бутове Евангелия// Иисуса Христа Сына Божия

  Стихиры на стиховне, гл.2,
подобен "Доме Евфрафов" :

Бутово - земле дивноглубокая,/ Златом Церкве преисполненная/ От сокровищ Царства Божия, -/ Недр яви богатство вышнее - // Славу новых мучеников.

Тебе ради, Господи/ умерщвляеми есмы весь день:

Бутово - юдоль страшноплачевная,/ Кровми святосеянная,/ Слезы мирными орошенная,/ Жизни вечныя прозябни класы - // Любовию новых мучеников.

Вменихомся/ якоже овцы заколения:

Бутово – премирный саде - / Древний цвет взрастивший/ Жизни новыя свидетелей, -/ Плодопринеси смирение нам // Терпеливодушием мучеников.

Слава, глас и подобен тойже: Бутово врата небесныя,/ Страшнодивновеликия,/ Кровми праведник священныя,/ Отверзай божественныя входы верным// Дерзновением святых мучеников.

И ныне, глас и подобен тойже: Сень новую обретшая в Бутове,/ Сень свята, Державная Владычице, - / Собирай в священный кров люди Божия, -/ Ты бо немощных Печальница// И упование мучеников.

  Тропарь, глас 4

Нивы церковныя зрелыя класы/ Плод сторичный яве приносят/ Смертною в Бутове страдою за Христа/ Паки же сеются во укоренение веры/ Укрепляют ны надеждею небесных/ Добропобедныя свидетелие Истины и Любви/ Дерзновеннии о нас молитвенницы/ Се воистину кровь мученическая// Семя Церкве есть.

  НА УТРЕНИ

Седальны

По 1-й кафисме: Подвиг ваш – нам терпения образ, уничижения ваша – се, смирение нам, смерть же ваша – упование нам, о мученицы!

Слава и ныне: Вверяются Ти чадца наша, о Мати, се бо Сыну Твоему со пророком вопиют плачевным: сири быхом несть отца.

По 2-й кафисме: Умертвителю ада даже до смерти служаще, о мученицы, служителей пагубы никакоже устрашилися есте.

Слава и ныне: О Заступнице неусыпающая! Не оставила еси страдальцев за Христа в Бутове умученных и в земли оной успнувших, и нас, немощных, заступлением не остави, Мати.

 

По полиелее:

Огорчися ад древле, срет доле Христа, паче же поруган бысть силою Воскресшаго, ныне же посрамляются самоизмышленныя пагубы рачитилие силою духа мучеников - Истины свидетелей.

Слава и ныне: О Иисусе воскресшем проповедуют апостоли, преподобнии утешаются, мученицы дерзновение приемлют, паки же и паки молит о нас Того Богородица.

Прокимен, глас 4: Тебе ради, Господи/ умерщвляеми есмы весь день:Стих: Вменихомся/ якоже овцы заколения:

Евангелие от Матфеа, зачало 36

Стихира по Евангелии, гл.6

Святым, иже суть на Руси святей,/ Новомучеником преславным,/ Удиви Господь хотение Свое,/ Еже Церковь Русскую возродити/ Дерзновенным сих ходатайством,/ Сего ради о уделех своих умоляющим/ Мучеником Бутовстим возопиим:// Радуйтеся, новыя звезды тверди церковныя.

КАНОН, глас 6,
егоже краегранесие:
Бутово претихое плач еси нам и упование

Песнь 1

Ирмос: Волною морскою скрывшаго древле гонителя мучителя под землею скрыша спасенных отроцы, но мы яко отроковицы Господеви поем, славно бо прославися.

Святии новомученицы Бутовстии, молите Бога о нас:

Боже и Отче, Слова Родителю, кое принесу слово, кое пение дерзну воспети святым, славно Ти в оных прославльшемуся.

Святии новомученицы Бутовстии, молите Бога о нас:

Ужасается небо и земля трепещет от судищ измышленных, прелютых биений, устреляний безчеловечных, яже быша вам горний восход от рвов преисподних, о мученицы

Слава: Тугу Христову Иезекииль зрит, яко рыдание, жалость и горе - се медоносный свиток, и ваша утробы насытивый в дусе пророчестем, страстотерпцы.

И ныне: О Мати! О Дево! О Богородице! Заступлением нас не остави, вопияху мученицы.

Песнь 3

Ирмос: Тебе на водах Повесившаго всю землю неодержимо тварь видевше на лобнем висима, ужасом многим содрогашеся, несть свят, разве Тебе Господи, взывающе.

Святии новомученицы Бутовстии, молите Бога о нас:

Велии ваша страдания, мученицы, велия сердца о присных туга, превелие же о Господе желание любомудрии, еже достигше, вопиете присно: разве Тебе, Владыко, несть воистину ин свят.

Святии новомученицы Бутовстии, молите Бога о нас:

Осуждение смерти носяще в себе прежде суда безбожна, апостолу язык подражающе, мученицы, не на ся надеяние, но в Безсмертнем Судии мудре утвердили есте.

Слава: Павел убо дерзновением вопиет, яко жив есть Иисус умерый, се же мученик свидетельство в Бутове: Иисус Христос вчера и днесь, Тойже и во веки.

И ныне: Родила еси, Пречистая, Единострадальца о всех, убо славу поем Тя мучеников, и верных похвалу.

Седален, гл.6:

На Христа востают иже греха рабы, на рабов Христовых ополчаются, но уязвленныя паче Христовою любовию мученицы, верою разжженыя тех отражают стрелы и от Онаго дерзновение приемлют, еже о нас непрестанно молитися

Слава и ныне: На Тя, Богородице, упование возлагаем, в немже мученицы не погрешиша, но одолеша во Христе смертию смерть. крепкодушнии.

Песнь 4

Ирмос: На Кресте Твое Божественное истощание провидя Аввакум, ужасся вопияше: Ты сильных пресекл еси державу, Блаже, приобщаяся сущим во аде яко всесилен

Святии новомученицы Бутовстии, молите Бога о нас:

Еже во утеснении жити Христос вам есть, еже люте умирати, паче мирствуя в Нем, - неценимое есть приобретение.

Святии новомученицы Бутовстии, молите Бога о нас:

Терпим, гонимии, укоряеми, благословляем, хулими, утешаемся, - се бо Тебе, в Девичестем чреве испекшася, во утробах носихом, Христе - Хлебе наш.

Слава: И храмы Твоя, о Вышний Архитектоне, отъяшася поруганнии, и домы раб Твоих предани быша татем, - се нашествие, паче иноплеменнича.

И ныне: Христообразною милостию исполняются сердца мученик, под Твою неизчетную прибегших милость, сомолитвенники убо приими о рабех Твоих, Мати Милосердая.

Песнь 5

Ирмос: Богоявления Твоего Христе еже к нам милостивно бывшаго, Исаия, Свет видев невечерний, из нощи утреневав взываше: воскреснут мертвии и возстанут сущии во гробех, и вси земнороднии возрадуются.

Святии новомученицы Бутовстии, молите Бога о нас:

О храмех пылающих сердце жалостию горит, паче же о сожженней человеков совести, помяни убо Господи, что бысть нам.

Святии новомученицы Бутовстии, молите Бога о нас:

Еже ради Тебе немощных не презри, Всемощне, немощи ради нас приобщивыйся, убо призри и виждь укоризну нашу.

Слава: По пророку, мерзость зрим запустения: на местех святых скверныя изрыгаются словесы, всескверныя же творятся деяния, - се, достояние наше обратися к чуждим.

И ныне: Лишаеми сна, надеждею не погрешают святии, еже на волею из Тебе, Госпоже, бывша Раба, пострадавша и успнувша о всех, сих же ныне с Собою возставивша.

Песнь 6

Ирмос: Ят бысть, но не удержан в персех китовых Иона, Твой бо образ нося страдавшаго и погребению давшагося, яко от чертога от зверя изыде. Приглашаше же кустодии хранящии суетная и ложная милость сию оставили есте.

Святии новомученицы Бутовстии, молите Бога о нас:

Апостольски не точию юзники вожделели о Господе быти, о крепкодушнии, паче же за имя Его и на смерть дерзнули есте.

Святии новомученицы Бутовстии, молите Бога о нас:

Что воздадим о всех Господу - вопияху в Бутове верныя Его раби - паче же благодати чада обрелися есте, претерпевше вся до конца.

Слава: Ежеобразными иглами злодейств преуставлены, страхом Божественныя десницы спогибают мужие кровей, еяже сподобляются христозваннии мученицы.

И ныне: Се, на выя гонимии, томимии жаждею, благородием душ утверждаются мученицы, нетленныя жизни источник обретше Тя, Богородице Царице.

Кондак

Русская Голгофа Бутово-село показася, яко древо спасения воздвигше Соловецкий крест, яко гроб святый явивше пребезмолвныя рвы – громогласныя свидетели страстей и воскресения.

Икос

Кто, мученицы Бутовстии, изречет ваша труды и болезни, тяжкия скорби и смерть, - вся убо сия претерпели есте за Христа. Сего ради ныне воспеваете Богу на небеси победный глас и за ны молитеся, яко неложнии свидетелие страстей и воскресения.

Песнь 7

Ирмос: Неизреченное чудо: в пещи избавивый преподобныя отроки из пламене - во гробе мертв бездыханен полагается - во спасение нас поющих: Избавителю Боже благословен еси.

Святии новомученицы Бутовстии, молите Бога о нас:

Иждиваемы огнем Божественным, пагубу наследствуют несветимую вси рачитилие тьмы, еяже избегше, светоносныя мученицы вопиют: Избавителю Боже благословен еси.

Святии новомученицы Бутовстии, молите Бога о нас:

Низпадают в преисподний тартар вси гнева сыны, кротостию уязвлени мученик, не могуще вечнующую воспети песнь: Избавителю Боже, благословен еси

Слава: Архидиакону и первомученику наследницы явилися есте страстотерпцы славнии, новую нам источаете благодать, еже с вами взывати: Избавителю Боже благословен еси

И ныне: Мучеником непобедимым пребывшим, воздвизается на богопротивныя сила Креста, во еже звати христопобедным присно: Избавителю Боже, благословен еси

Песнь 8

Ирмос: Ужаснися бояйся небо и да подвижутся основания земли се бо в мертвецех вменяется в вышних Живый и во гроб мал странноприемлется Егоже отроцы благословите, священницы воспойте, людие превозносите во вся веки.

Святии новомученицы Бутовстии, молите Бога о нас:

Истощитися невозможно есть дерзновению Христовых мученик, от Стефана перводиакона и до Бутова и даже до скончания времен взывающих: отроцы благословите, священницы воспойте, людие превозносите во вся веки.

Святии новомученицы Бутовстии, молите Бога о нас:

Ураняеми смиренномудрствуют, биени никакоже отчаяваются, убиваеми в краеугольный бут новыя жизни полагаются мученицы, о Христе возсозидая вся.

Благословим: Песнопоют духом с Богоприимным страстотерпцы, от богоборных устреляеми: «Ныне, Владыко, отпущаеши с миром рабы Твоя,» - се же Ангелы на небесех сретаются.

И ныне: О страданиих ваших кто не поболезнует земный, о блаженстве вашем кто не возликует небесный! Темже, святии, о благодати вашей да радуется с Богородицею вся тварь.

Песнь 9

Ирмос: Не рыдай Мене, Мати зрящи во гробе Егоже без семене зачала еси Сына : возстану бо и прославлюся и вознесу со славою непрестанно яко Бог верою и любовию Тя величающия.

Святии новомученицы Бутовстии, молите Бога о нас:

Во очию нашею самоизмышленныя пагубы рачитилие низлагаются, се чаяния исполняются плачевная страстотерпцев, се новотворится Святая Русь.

Святии новомученицы Бутовстии, молите Бога о нас:

Аду трепещущу, дерзновением и надеждею соявляетеся, святии, соубиваемым вам страдальцем, научая в смерти и во веки величати Содетеля всех.

Святии новомученицы Бутовстии, молите Бога о нас:

Новотворятся храмы, идеже вы трудистеся, славнии, се души воздвизаются земнородных на ваше подражание, приснопамятнии.

Слава: Именами вашими чада нарицаем, блаженнии, память вашу любовию празднуем, немощное да не презрите словес, да и совершеннейшия похвалы воздадятся вам.

И ныне: Егда славнии новомученицы воздохнут о нас Богородице, - уповаем Тою спасение улучити и возопити Благословенней: Яже о всех благая Мати - слава Тебе!

Светилен:

Се в Бутове светосияюят мученицы, се, ко Христу стезя нам расширяется.

Слава и ныне: Се, Раба Господня - се вещание Твое ко Архангелу, Чистая, се, Небесная дольним совокупляются - се и дольним нам о небесных надеяние.

На хвалитех – стихиры мучеником 4 повторяюще , глас 3:

Хвалите Его на силах Его:

Мняще свободитися от совести-мучительницы,/ Всуе о свободе превозглашаете,/ Раби суще нижайших страстей,/ На беззащитныя вооружаетеся, мучителие,/ Лающе и терзающе, ихже недостоин мир,/ Мните сломити непреклонныя,/ Паче щенячую вашу немощь являете,/ Техже крестославную свободу// Неволию, буии, проповедуете.

Хвалите Его во гласе трубне:

Свободившеся от незримых уз миролюбия,/ Истину познаша мученицы,/ Яже есть Иисус-Господь,/ Сего ради в Нем победивше мир,/ Паче Им распялися миру,/ Злостраданием и смертию лютою/ Яже срете их в веси Бутовстей,/ Идеже от привременных мира и жесточайших/ Восприят возлюбленных желаемый Господь Иисус,// Подая с небес свобождение вечное.

Слава, глас 3: Звани бысте Божественным Промыслом, мученицы,/На свидетельство о Христе в яро Бутово/Да в расстрельных рядах и во рвах земныхи в небесном раи объимаяся,/Еже в Троице Пребожественней/Единение обретшее истинное,/ -Миру, мучиму ненавистною рознию,/Всепобедный любве образ явите,/Да и наши во гресех разделения//Молитвами теплыми уврачуете.

Просмотров: 1441